State counselor Daw Aung San Suu Kyi kum 77 tlin lawmna piancham chu nimin June ni 22-ah khawvel hmun hrang hrangah urhsun taka hman a ni a. Amah Pi Suu Kyi erawh chuan Court lamah Birthday Cake kawngin ukil te nen ei hova an hman thu hriat a ni. Chutah chuan Pi Suu Kyi chuan, ‘Mipuite chu lo dang tlang tur leh inlungrual vek tura a fuih thu’ a ukilte hnen atanga hriat a ni bawk.
Chutih rualin USA, News York NYCBC (New York City Burmese Community) leh H2B (Helping Hands for Burma) pawlten Pi Suu Kyii kum 77 tlin lawmna chu Flatiron Pulbic Plaza-ah US hun dar 3:30 atanga tlai lam dar 5:30 vel thleng an hmang a.
Chutah chuan Myanmar UN Ambassador U Kyaw Moe Tun leh Panselu te pawh an tel thu hriat a ni a. Chutiang bawkin khawvel hmun hrang hrang leh Myanmaw ram chhunga PDF pawl hrang hrang Tamu PDF lam thlengin duhsakna an hlan thu hriat a ni a. Pi Suu Kyii piancham chungchanga Pu Tluanga Chhakchhuak thuziak hi han tarlang chhunzawm ta ila.
1988 kum atangin tun 2022 kum thlengin a politics zin kawng bumboh tak kum 34 chunga ( Military ruler) sipai sorkar hrang hrang chuan vawi duailo chhuanlam fahrah te te siamin an lo hreng bet tawh a, a piancham birthday hi vawi 16 ringawt an hrebehna hnuaiah a lo hmang tawh a ni.Tunah pawh kum 77 a tlinna piancham chu court lamah lainat awm takin a hmang liam a.
Sipai sorkar chuan case 19 lai phuahchawp in kum 100 chuang lungin tan theihna thubuai an siam sak mek a, amaherawh chu Daw Aung San Suh Kyii chu mi duailo tak hi a ni a, chutiangin a chungthu rel mahse beidawng mangang a chiai mai mai tur hmeichhia naran chu a ni bik lo.
Military Council hoin an puhna thubuaite hi chik taka ngaihtuah pawh ngailo, thu belhchiandawl lo hlir a ni hlawm tih khawvel hriat a ni.He Myanmar rama hmeichhe hruaitu hi a politics lamtluang a zawh chhung zawngin mipui thlawp hlawh ber politician a la ni rih a, Myanmar ram chhung mai bakah khawvel hriat hlawh ber politician a la ni ani.A politics hmathlir-ah nghet taka a din reng avangin mipuite lainat leh ngainat a hlawh fo reng a ni.
Daw Aung San Suh Kyii hi Myanmar Democracy tundin leh nan hian a neih rosum bakah a nunna thlapin a lo beichiam tawh tih a hriat theih a, Ethnic issue lam emaw federal union ram din kawngah hian a theih tawkin hma a lo la ve thin a ni.
Kum 2015 inthlanpui a NLD party in sorkarna an chan atangin Daw Aung San Suh Kyii piancham a thlen hun June ni 19 apiangin mipui ten thingtiak an phun a, blood donation camp neiin thisen pek runpui an nei thin a ni.Naypyidaw khawpuia parliament staff te chu hna hnuaihnung ber thawk thlengin a birthday June ni 19-ah lawmna eiin a buatsaih chu a hlui thin a ni.
Nikum a piancham lawmna hun erawh chu sipai lal ten mipui sorkar namthluin thuneihna an pawnglak tak avangin a piancham mipui ten kan lawm thin ang chu kan hmang thei ta lo a, Myanar ram chhunga politics avanga an hrente zawng zawng chhuah phutin a birthday takah” Flower Strike” an nei ta zawk a nih kha.
Kumin-a Daw Aung San Suh Kyii piancham lawmnaah chuan, a tawngkam hman lar tak pakhat la chhuakin ” Freedom From Fear” tih place card kengin kut leh lamah 77 tih ziak lek chhuakin a piancham chu thinlung taka hman a ni.
