Kayin Ni hmun, Kayah (Ka Ya) State, Demoso khawpui ni chhuahna lamah Military council sipaite leh Kayinni PDF-te inkahnaah village tract 4-a tualchhung mi 30000 chuang in leh lo an tlansan thu raltlan tanpuitu ten an sawi a ni.
Heng raltlante zingah hian inkah hmasak khan mi 8000 chuang an lo tlanchhe tawh a, heng zingah hian naupang leh kum upa te an tel nual thu hriat a ni.
“An tlansan tak buhfai leh eichawp thil te Military council sipai ten Bawlakhe (Baw La Khe) khuaah an thliar lut vek a. Raltlan ten theih tawp an thliar bawk a, tunah chuan ei in tur leh damdawi an mamawh hle” tiin Kayinni raltlan tanpuitu zinga Ko Ba Ngia chuan BBC Media a hrilh a ni.
Hetia tualchhung mipui tlanchhe tur thenkhatte tanpuitu ten an puih laiin Military council sipai ten kawng lakah an dan thu hriat a ni.
Tun dinhmunah hian chhanchhuah hna an la thawk mek thu hriat a ni a. Tlanchhe thei lo tangkhang zat hriat chian a la ni lova, inkah buaina a la awm rih avangin hruai chhuah an la thei rih loh thu tanpuitu pawl zinga Ko Ba Ngai chuan BBC Media a hrilh a ni.
Military council sipai ten Demoso khaw chhehvelah ralthuam liana an beih chiam avangin raltlante hliam an awm nual thu PDF leh raltlante hnen atanga hriat a ni bawk.
Military council sipai ten Demoso khaw ni chhuah lam Bawlakhe khuaah operation 3, Pinlaung leh Pekon (Phe Khong) khuaah operation 4, Dawse leh Kan Kuh Hna Sin khuaah operation 2, Sia Taw khaw lam operation 3-in February chawhnu an bei a.
Tun dinhmunah he inkahna avangin Kayah State-a mipui nuai 3 chuang, hmun 3-a then hmun 2 te an raltlan mek a ni.
