Chin State, Falam khawpui atanga Halkha khawpui pan mek Military Council te chu Chin PDF pawl 3 tangkawp te nen an inkap chiam a. Military Council te thi leh hliam an awm nual angin CNA sipai mi 2 an boral thu hriat a ni.
Military Council mi 200 rual ten Tank 2 leh Sipai Motor 20 chuang inzui te chuan Falam khawpui atanga Halkha khawpui an panna kawngah Feb. ni 28 atang khan CNA, CDF/CNDF tangkawp ten an lo lambun a.
March ni 2-ah chuan Falam atanga Halkha khawpui panna kawngtluana awm Dokthek leh Thlanrawn khaw inkarah an inkap nasa hle a. Military Council lam, thi leh hliam an awm nual a, CAN sipai mi 2 an boral thu CBDF thupungtu chuan a sawi.
‘ Inkahna chu a nasa khawp mai. Nimin kha chuan nilengin kan inkap a,anni lam chuan rinthuin ralthuam lian an tawngpawng kah chiam mai a. Ni tlak lam phei zawng an tuam huk avangin CNA sipai mi 2 an kap fuh
ta a ni’ tiin a sawi bawk.
March ni 2, inkahnaa boral ta CNA sipai 2 te hi Salai Za Hnin leh Salai Van Boih Bik te an ni a. Military Council lam hi mi eng zat nge an thih tih hriat chian an ni lo’ tiin a sawi zui bawk.
Feb. ni 27 khan Falam leh Halkha inkar Tlangzar khaw kiangah CNDF sipai pakhat Military Council ten a man a, a mit mu kher chhuahsakin a nghawngah an zaisak thu hriat a ni tawh a.
March ni 2-a Military Council te nen an inkah tum khan tlai lamah chenna in 20 nufa awmna Dokthek khua an halsak a, chenna in 7 an hal chhiatsak thu hriat a ni.
‘Military Council lam hi thi leh hliam an tam deuh a ni ang, Dokthek khua an hal ringawt a. Hetia, an chan a chhiat zual hian an thinrim hrikthlak nan chenna in an hal chiam thin a niawm e’ tiin CNDF thupuangtu chuan a ngaih dan a sawi.
Vawiin atang kha chuan Military Council te hian Dokthek khua chhuahsanin Halkha khawpui lam an pan leh tawh a, inkahna a la nasa mai theih, rin a ni.
Military Council rual te hian nikum 2021 October thla tir vel atang khan Anawratha hming chawiin Chin State, an kap chiam tawh a. Military Council te leh Chin PDF te inbeihna avangin Chin State-a Chin mipui 20% vel an raltlan thu hriat a ni.
