Kalaymyo khawpui atanga Military council sipai chho mek te March 18 zan khan Falam township, Var khuaah an innghat a. A tuk zing dar 8:30 vel khan Track ke 12 nei 13, armoured car 2 leh JCB-in Falam khawpuiah an chhoh thu hriat a ni.
Var khuaa an cham chhungin bomb kam an chil puaka Track ke 12 nei pakhat leh Skart motor hma lam a chhia a, an hnutchhiah thu tualchhung mi ten an sawi a ni.
Tualchhung mi pakhat chuan “Hemi zan hian School, meteorological office leh police office-ah te an riak hlawm a, In khatah Major 2 theuhin an riah chilh bawk a. Khawchhungah an che hran lova, An zinga pakhat chuan kawngah JCB-in ruang 20 vel kan phum tawh, kawng lakah an hnutchhiah nual a ni ang” tiin a sawi a ni.
March 18 khan Military council sipaite Var khua an thlen hmain CNDF, CNA, CDF-Hualngo tangrual ten tum 2 an beih thu hriat a ni.
Hemi hnu hian March 19, chhun dar 12:00 vel khan Falam khawpui Si Zamual khua leh Cawnghel khaw bulah Military council sipaite kal mek CNDF leh CNA ten darkar chanve deuhthaw an kah rawn thu hriat a ni.
Military council sipai thi leh hliam zat hriat an ni lova, chawhnu dar 5:00 velah Falam khawpuiah an lut a, tlanga camp-ah te, Hight school No.2-ah te, Town Hall-ah leh sport building-ah te an riak hlawm a ni.
Falam khawpuiah Kalaymyo atanga Military council sipaite an chhoh March 9 atangin internet leh phone an off vek a, Kpay, Wave hmanga pawisa lak leh pek chhuah chungchangah harsatna an thawh thu hriat a ni bawk.
