Chin State, Falam khawpui atanga Halkha khawpui pan mek Military Council te leh Chin PDF tangrual te June 8 atang khan an inkap tan a, Military Council lam mi 60 chuang an thih tawh thu CNF thu puangtu Salai Htet Ni chuan a sawi.
Military Council mi 200 rual, Motor 27 nena Halkha khawpui pan mek chu, CNA leh CDF tangkawp ten June 8 khan, kawng tluanin Bomb hmangin a ruka kah zeuh zeuh an ni a. June 11 thleng khan Military Council lam mi 60 chuang an thi a, PDF tangrual pawl lam mi pakhat a boral thu Salai Htet Ni chuan a sawi.
“Anni lam hi kan hre chiang chiah lo nain ni 5 chhung khan, mi 63 vel chu an thih a rinawm. Keini lam erawh chu mi pakhat a boral ve a, mi 10 vel chu an hliam ve a, an tlem khawp mai. Pahnih thum bak hliam na vek an awm lova, nimin khan pakhat chuan min boralsan ta a ni” tiin Salai Htet Ni chuan a sawi.
Chin tangrual pawl PDF atanga boral hi CDF-Matupi sipai zinga Salai Aa Long a ni a, nimina Falam leh Halkha inkar, Ramthlo khaw bula inkahnaah a boral ta a ni.
Military Council te leh Chin tangrual pawl te hian Falam leh Halkha inkar kawngpui, Taal, Tlangzar, Thlanrawn khaw kiangah tum 8 aia tlem lo an inkap nual tawh a. Chin tangrual pawl ten Bomb leh Laipui hmangin tum 4 zet an kah chhuah thu hriat a ni.
“ An rawn kalna hmun apiangah a remchan dan angin kan kap ru zeuh zeuh a. Khawchhung an luhin Chin mite chuan Khawchhungah mi an kap ngai lo an ti a ni ang, Khawchhung chenna in hal tawhnaah an luh hnuin kan kah chilh a, Laipui leh Bomb nen kan um zui bawk a, thi leh hliam an tam khawp mai” tiin Salai Htet Ni chuan a sawi.
Nimin khan Military Council te hian Thlanrawn khua atanga Doitek khua an pan laiin Chin PDF ten an kah avangin an kal chhunzawm thei lova Ramthlo khuaah an kir leh.
Military Council te hian Motor 27-in an thawk chhuak a, Motor 4-ah hian in sakna tur chakkhai phurin mi 40 vel an chuang a. kal hmasaah an tang thung. Falam leh Halkha kawnga Taal leh Tlangzar khuaa chenna in 35 vel an hal kang bawk.
Tun dinhmunah hian Falam leh Halkha inkar, inkahnaah CNA leh Chin PDF tangrual pawl ten an bei mek.
