The Tahan Post
Falam leh Halkha khawpui inkara chin hriat lova bo Tedim mi pahnih te ruang chu May 22 tuk khan Military council sipaite camp bulah an chhungten an hmuh thu hriat a ni a.
Ruang an hmuhna hi Halkha khua leh Hniarrawn khaw thar kiang Tiphul khaw kiangah Military council sipaite buk an khuarna hmunah a nih thu hriat a ni a.
Military council sipaiten Tiphul kiang, an camp awmna atangin an chhuahsan tawh hnuah May 22 tuk khan chin hriat lova bo chhungten an zawnnaah an hal tawh hnu ruang pahnih an hmuh thu mitthi chhung te hnaivai, mi pakhat chuan a sawi a.
“ Military council sipaiten camp an chhuahsan hnuah chin hriat loh chhungten ngaihtha lovin an va zawnaah an hal hlum ruang pahnih an va hmu a, an ruang hmuh hi hmel hriat chian ni tawh lo mah se, Tedim hnam inthuama hmuh a nih avangin an nemnget ta a ni” tiin a sawi a ni.
Heng mi pahnih ruang te hi Halkha khawpuia, a chhung te hnenah phurh luh a ni a, May 23 khan vui liam a nih thu hriat a ni a.
May 2 pawh khan Tedim khuaa kum 37 mi Nl. Ciin Hau Vung leh Halkha khuaa kum 32 mi Pu Lian Za Thawng te passport siam tura Falam leh Halkha khaw inkara an kal laiin ChongCung khua leh Halkha khaw inkar, Military council sipaite camp kiangah chin hriat lovin an bo tawh bawk a.
He thil thleng chungchangah hian Military council sipaite, PDF te leh an chhung hnaivaiten an zawng nasa hle a. May 22-a Military council sipaiten an buk khuarna atanga an tlansan tawhna hmun an va en a, Military council sipaiten an hal hlum Nl. Ciin Hau Vung leh Pu Lian Za Thawng te ruang chu hmuh a nih thu hriat a ni bawk.
24th May 2023
