Myanmar filmstar leh sexy model-a hriat lar Tin-Za-Win-Kyaw chu Shan ram Wan-Haii hmun tihhmasawnna kawnga documentary video la turin SSPP/SSA (ethnic ralthuam keng pawl, military council nena inremna nei) pawl awmna headquarters hmun Shan state chhim lam Chii-Tii township, Wan Hai hmuna a thlen thu SSPP/SSA (Shan State People’s Party/Shan State Army) thupuangtu Colonel Sai Suh chuan chuan DVB a hrilh a.
Ani chuan, “Kan control area-a a rawn kalna chhan ber chu kawng hrang hranga hmasawnna hank an thawhte video hmanga record tum a ni a. Myanmar model nena video han lak chu mipui lamin an ngaihven a rinawm a. Thil dang engmah a awm lo. Ani chu mi lar a nih angin, tourism lamah pawh mi a hip a rinawm bawk a ni,” tiin a sawi.
Tin-Za-Win-Kyaw chu Wan-Haii hmun a vawi khat thlenna a ni a, video shooting chu nimin lam atanga tan a nih thu leh Colonel Saii-Suh-a fanu upa ber inneihna nen a lo innang bawk nen shooting neihna atang, sipai uniform haa a tel ve nghal thu hriat a ni.
Wan-Haii headquarters nena inzawm Maii-Shuu township chhungah military council sipaiten force an dah belh a, inkahna a chhuah theih thu, chungchangah Colonel Sai Suh chuan engmah buaina chhuak tur a awm lova, khual zin mite pawh thlamuang taka an rawn chawlhhahdam theih thu a sawi thung a.
Chin state hmar lam Moee-Meik township chhungah chawlhkar hmasa khan military council sipaite nen inkahna chhuah zauh mah se, tualchhung mite an nat loh nan SSPP lam an tawlhsawn ang bawkin military council lam pawh an tawlhsawn thu hriat a ni.
SSPP/SSA ralthuam keng pawl chu Sr. Gen. Min Aung Hlai nen Naypyidaw lamah inbiakna la nei ve lo mah se, inbe tura a inpeih reng thu leh pece talk nei tura hming pe zinga an tel thu hriat a ni bawk a. Anni lam chuan, “Remna atana inbiakna chu eng pawl nen pawh ni se, keini lam chu kan inpeih reng. Sr. Gen. Min Aung Hlai nen pawha inbiak chu kan inpeih reng bawk. Anni lam atangin sawmna a la rawn thleng lova. Indona chu engzat pawh ni se, a tawpah chuan inbiakna hmanga a hmawrbawk a ngai thin a. Shan state army (Restoration Council of Shan State) nen inbe turin vawi thum kan ruahman tawh a, SNLD a kum 30 champhaah vawi khat, RCSS sipai lam mawhphurna latu hnenah vawi hnih kan thlen a, mahse anni lamin engmah min la chhang lo a ni,” tiin an sawi.
SSPP/SSA chu NCA (Nationwide Ceasefire Agreement)-ah tel lo mah se, military council hotu sawmna Peace talk-a tel turin an lo chhang let tawh a ni.