Magwe region, Gangaw township, Syuakpin (Siah Pin) khua leh Pauk Khu khaw inkara Military council sipaite leh Phyusawhti hote bomb kam hmanga an beihnaah Military council sipai 3 an thih thu Yaw PDF sipai Yaw Lay chuan a sawi a ni.
March 19 zing dar 11:00 vel khan Thilin township atanga chhuak Military council sipaite leh Phyusawthi mi 50 rual, motor 4 te kawng lakah Yaw PDF ten bomb kam hmanga an beihnaah Phyusawthi 20 an thal a, mi 3 a hmunah an thih thu hriat a ni.
YPDF ten bomb kam hmanga an beihnaah Military council sipai leh Phyusawhti te thi leh hliam an awm nual avangin an rak chelchul a. Hma lam nawr ngam tawh lovin thi leh hliam te an thliar hnuah Gangaw khawpuiah an kir leh thu hriat a ni.
Magwe region, Thilin khawpuia atanga chhuak Military council sipaite Gangaw khua an panna kawng tluanah bomb kam hmanga beih an ni a. Heng avang hian mipuite beih theihna dinhmunah an din avangin inthliar fihlim tur leh inkah theihna boruakah fimkhur turin Yaw PDF ten mipuite a hriattir a ni.
Hetiang vek hian Sagaing region, Dapeyin khua ni tlakna lama Khawthar haltu Military council sipaite an beihnaah Military council sipai 6 an thih thu Freedom Revolution Force (FRF) hnen atanga hriat a ni.
March 17 chawhnu dar 6:00 vel khan Dapeyin khua, ni tlakna lam Khawthara Military council sipaite Freedom Revolution Force (FRF) company 1 leh 4 ten 40 MM-in an bei a, Military council sipai 6 an thi a. Military council sipai thi leh hliam an tam avangin zan dar 12:00 vel khan Dapeyin khuaa chenna in 13 an hal chhiat thu hriat a ni bawk.
