Chin State, Halkha khawpui Agape Clinic-a awm mek Doctor pakhat leh Nurse 4 te May 21 zan lai vel khan Mlitary council sipaiten luh chilhin an man thu tualchhung mi te hnen atanga hriat a ni a.
Mlitary council sipaite hian May 21 zan lai vel khan Halkha khawpui Zyi Haung Ward, Agape Clinic an luh chilh a, Dr. Sicilia, Nurse Henny, Sian Lun, Hniang Sung leh J Mawi an man thu hriat a ni a.
Halkha khawpuia tualchhung mi pakhat chuan “Zan laiah Agape Clinic-a nurse te an man ringawt a, Mlitary council sipaite hian zan lamah an chhe fo thin a, an man chhan kan hre mai lo. Tum danga an tih thin angin thalai rual an man te, nihna nei deuh te nen inthleng leh an duh vang a ni ang” tiin a sawi a.
Heng mi 5 an man te hi Halkha khawpui police station-ah an la khung mek a. April 2 khan Military council sipaiten Agape Clinic-a thawk mek Doctor 2 leh mi 3-te an chenna inah an man tawh bawk a, heng mi te hi April thla laihawl vela PDF-ten an Officer man te nen an thleng hnuah an chhuah leh thu hriat a ni bawk.
Hetiang vek hian May 21 zan pawh khan Halkha khawpui Veng thenkhatah Mlitary council sipaiten mikhual an check-naah tualchhung mi 20 chuang an man tawh bawk a ni.
