Chin State, Halkha township Zokhua khaw bulah Military council sipaite leh CDF tangrualte May 13-a, vawi 3 an inbeihnaah Military council sipai 11 an thih thu hriat a ni a.
Magwe region Gangaw khawpuia chhuak Military council sipai Division 77 te leh a pui tura kal mek, Halkha khawpui ramhnuai atanga thawk chhuak mek te, CDF-ten an inbeih thu hriat a ni a.
Military council sipai 50 rual Division 77 te leh Hakkha khawpui atanga an thiante pui tura chhuak Military council sipai 70 rualten Halkha kawng an zawh laiin Zokhua leh Satta khaw inkarah CDF sipaiten an lo lambun a, Military council sipai 11 an thih thu CNF/CNA thupuangtu Salai Thet Ni chuan heti hian a sawi a.
“May 13 khan vawi 3 an inbei a, chawhnu dar 1:00 vel atangin an inbei tan a, dar 2:00 velah leh dar 2:30 velah an inkap leh a. Hemi ni hian hmun 3-ah vawi 3 an inkap a, Military council sipai 11 an thi nia hriat a ni a, hei ai pawh hian thi leh hliam an tam mai thei” tiin Salai Thet Ni chuan a sawi a ni.
Division 77 Military council sipai 200 rualten April chawlhkar atang khan Magwe region Gangaw township atanga Halkha khawhpui an pan laiin CDF tangrual pawlten kawng lakah an lo lambun avangin Military council sipaite thi leh hliam an awm nual an rin thu Salai Thet Ni chuan a sawi zui a.
Halkha leh Gangaw khawpui inkarah Military council sipaite leh CDF tangtual pawlte April chawlhkar 2 atang khan ni 20 chuang an inbeih tawhnaah Military council sipai thi leh hliam zat hriat theih a nih loh thu Salai Thet Ni chuan a sawi zui bawk.
“Military council sipai 200 rual an rawn thawk chhuak niin kan hria a, tunah chuan mi 50 vel chauh an bang tawh niin kan hria. Thi leh hliam an tam hle a ni ang Helicopter-in an rawn thliar nasa hle a, mi 60 leh 70 vel an thih ngei kan ring” tiin CNF/CNA thupuangtu chuan a sawi zui bawk a ni.
Halkha leh Gangaw khaw inkara inbeihnaah CDF-ten Military council sipai ralthuam silai 15 an laksak tawh a, May thla tir pawh khan Military council sipaiten Helicopter-a an thlak silaimu tam tak an laksak tawh thu hriat a ni bawk.
