Chin State, Halkha khawpuia Chin mi, Mercy Ngun Tha Cin chu PDF-te nen an inhnamhnawih tiin September 18, zing dar 9:00 vel khan Military Council sipai ten an hman thu hriat a ni.
Mercy Ngun Tha Cin hian Social Media-ah mipuite tithlabar zawng leh Khawchhung muanna tichhe tur zawng bakah PDF-te thlawp zawnga thu a post thin tia puhin ama Dawr Cengkerh Collection, Chin hnam thuam Dawrah an man thu Military Council, Fifty Two News-ah an tarlang.
Mercy Ngun Tha Cin hi zai thiam lar tak niin Kohhran leh khawtlanga inhmang mi tak a nih thu hriat a ni bawk.
Halkha khawpuiah hian ani ang bawka PDF-te nena in hnamhnawih anga an puhte, Military Council sipai ten an man hi, an awm nual tawh thu Halkha khawpuia tualchhung mi pakhat chuan a sawi.
“ Khawpui chhungah hetianga an man hi an awm nual tawh a. Jail-a an khung tawh hi hmeichhia leh mipa an ni nuk hlawm a. Henga an man te hi, man tur zinga mi an ni lo hrim hrim” tiin Halkha khawpuia mi ten an sawi.
Chin State khawpui ber Halkha khawpuiah hian Military Council sipai ten, kawng kawi tinah ni tin an check a. Kawnga veivak leh Bike chuang reng reng Phone an check thin a, an rinhlel deuh te, an man nghal zel thu hriat a ni.
Chawlhkar kal taah pawh khan hetiang vek hian man an nei nual tawh a, Halkha Jail-ah an khung nual thu hriat a ni.
