Chin State, Halkha khawpuia Military council sipai tana ei in leh chakkhai phur Tank 2 leh Military council sipaite kal mek te CDF tangrual ten kawng lakah an beih rawn thu CNF/CNA thupuangtu Salai Thet Ni chuan a sawi.
Sagaing region Kalaymyo khawpui atanga chhuak Chin State, Halkha khawpuia pan mek ration leh ralthuam phur Military council sipai motor 30 vel leh Tank 2 te kawng lakah CDF tangrual ten bomb kam leh Drone hmangin an beih rawn thu hriat a ni a.
“Kawng tluanin kan bei zel a, April 13 khan an Tank leh ration phur ke 6 nei motor leh ke 12 nei motor lian bakah JCB te kan tihchhiatsak a, tu mah Halkha khawpui an lut thei lo” tiin CNF/CNA thupuangtu Salai Thet Ni chuan a sawi a ni.
April 11 thleng khan Falam leh Halkha khawpui inkarah CDF te leh Military council sipaite inkahnaah Military council sipai motor 10 chuang leh Tank tihchhiatsak a ni a. April 13 khan ChhawnChung khuaa inkahnaah pawh Military council sipai motor la bang zawng zawng tihchhiatsak vek an ni bawk.
Military council sipaite Kalaymyo atanga an chhoh lai khan sipai 200 bawr vel an ni a. tunah sipai 40 vel chauh an bang tawh, kawng lakah sipai 100 chuang fe an thih a rin thu Salai Thet Ni chuan a sawi a.
“Keini chuan a zat chiah hre lo mah ila, Military council sipai 200 zingah 40 chauh an bang tawh niin kan hria a. An thih vek chu kan ring lova, mi 120 vel chu an thih kan ring. Thenkhat chu hliam leh dam lohna avangin an awm mai thei, Zaa 70 chu an thih ngei kan ring” tiin Salai Thet Ni chuan a sawi a ni.
Kalaymyo leh Halkha khawpui inkar ni khat lek thlen theihnaah Military council sipai ten thla khat chuang thangin Halkha khawpui an la lut thei lova. Halkha khua atanga mel 17 vela hla Chhawn Chung khuaah an la tangkhang rih a, an thiante pui turin an koh mek thu hriat a ni a.
April 13 chhun vel khan Military council sipai ten Chhawn Chung khua leh a chhehvelah Thlawhnain an bomb chiam thu hriat a ni bawk.
