Chin State, Halkha khuaah Inrinni leh Sunday-ah Military council te hnenah inkhawm phalna dil lawk a ngaih tawh loh thu Halkha kohhran upa tangrual pawl (HCMF) te hnen atanga hriat a ni.
Halkha kohhran tangrual pawl leh kohhran upa ten Military council-te hnenah an biak rawn angin, inkhawm an phal leh thu Halkha khuaa Pastor pakhat chuan a sawi.
“Biak in awmna, Pastor hming leh an phone number bakah pungkhawm zat te an hrilh hriat tawh hnuah inkhawm an phalsak a ni” tiin kohhran upa pakhat chuan a sawi.
Halkha khuaah Sunday inkhawm hun turah zing dar 7:00 atangin chawhnu dar 4:00 hun phalsak an ni a. Inrinniah erawh chuan inkhawm leh inbuatsaih lawkna atan zing dar 11:00 atangin chawhnu dar 4:00 thleng Military council ten an phalsak thu Halkha kohhran tangrual pawl ten an thuchhuahah an tarlang a ni.
Heng an phal hmun hi Halkha khawchhung kohhran tan chauh a ni a, Military council ten hun tiam anga an phalsak angin Inrinni leh Sunday-ah an inkhawm thei dawn ta a ni.
Heng bakah hian Inrinni leh Sunday a nih loh chuan kohhrana pun khawm leh meeting, training (course), inneih, tawngtai inkhawm a awm chuan ni 5 hmain Military council township Administration office-ah phalna lak lawk a ngaih thu hriat a ni bawk.
Heng lo pawh chhiatni an awm pawhin Military council hnenah phalna lak a la ngai thova, Military council rorel chhung hian tualchhung mipui ten harsatna an neih chuan HCMF hnenah tanpuina a dil theih thu an thuchhuahah an tarlang bawk a ni.
Military council ten February 2 atang khan Chin State township 7-ah Matial Law an puang a. February 2 khan Martial Law an puanna Halkha, Falam, Tedim, Thantlang, Tawnzang, Kanpalet leh Matupi khuaah zan curfew leh mi 5 aia tam, awm khawm an phal loh thu an puang zui bawk a ni.
Hetia thupek an chhuah hnu hian Sunday inkhawm turin District office-ah kar khat hmaa inkhawm phalna dil lawk a ngaih thu February 13 khan Military council ten thuchhuah an siam avangin harsatna an tawk nasa hle a ni.
