Chin State, Halkha khawpui, kawng 6 infinna Junction, Halkhathar Vengah tukin khan Military Council sipaite leh PDF-te an inkap a. Military Council sipai ten ralthuam lian an kah avangin tualchhung mi 4 an hliam thu hriat a ni.
Tukin zing dar 6:00 vel atang khan Halkhathar Vengah darkar 2 chhung an inkap tawn a. Military Council sipai ten ralthuam lian an kah chiam avangin chenna in pakhatah Bomb a tla a. Bomb puakah hian an tlakna ina an chhungkaw chaw ei lai, mi 4 an hliam thu Halkha khawpuia tualchhung mi pakhat chuan a sawi.
“ Tukin khan Halkhathar Veng, kawng 6 infinna kawngthuamah thalai rual te leh Military Council sipai te an inkap a. An inkap rei ve deuh a, Military Council sipai ten an duhna hmunah an tawngpawng kah chiam a” tiin Halkha-a tualchhung mi pakhat chuan a sawi.
Bomb puak vanga hliam tuar te hi Halkha khawpui Civil Hospital-ah an enkawl mek thu hriat a ni.
Halkha khawpuiah hian Military Council sipai ten ralthuam lian an kap chiam thin a. August 10 pawh khan kum 60 mi vel, nu pakhat an kap hliam tawh bawk.
