Chin State, Halkha khuaah January 25 chawhnu khan Military council sipai tualchhung mi te leh khualzin mi 13 an man a, kum 16 hnuai lam tleirawl mi 7 an chhuah leh thu Chin human right pawl CHRO hnen atanga hriat a ni.
Halkha khua Cawlhbuk Ward-ah Janaury 25 khan Military council sipai te leh CDF-Hakha te an inkap a, Military council sipai 2 an thi a. He inkahna avangin Military council sipai ten chenna in 3 Khawlin an nawr chhiat bakah khualzin leh tualchhung mi 13 an man a ni.
“An inkah hnuah Military council sipai te an rawn thleng a, chenna in an thiah nual hnuah In pakhata mi an man bawk a. Check gate-a pal tlang tur te dawm dingin an man a, January 15, zan dar 7:00 thlenga kan hriat dan chuan mi 13 an man niin kan hria” tiin Human right pawla Director Salai Za Uk Ling chuan a sawi.
Military council sipai ten an man zinga kum 16 hnuai lam tleirawl mi 7 te, Janaury 26 chawhnu khan an chhuah leh a, mi dang 6 te an chin hriat an la nih rih loh thu a sawi zui bawk.
“Hetia chenna in an tihchhiat leh mihring an man hi inthlanpui tur Democracy Election an puan dan nen a inmil lo hle a. An chet dan hi Democracy dan an bawhchhia a, mihring dikna chanvo an pal zut bawk a ni” tiin Za Uk Ling chuan a sawi.
Chawlhbuk Ward-a Military council sipai check gate hi Halkha atanga Matupi panna motor kawnga gate awmchhun a ni a.
Military council ten thuneihna an lak hnu hian Military council sipai ten he check gate-ah an duty reng thin a. Mipui te an duh angin sum leh pai an dil a, bungrua te an laksak bakah phalna lehkha nei lo te luh chhuah an phal lova, mipui te an vau reng thin a ni.
