Chin State, Halkhaah May 21, zing dar 1 vel khan suamhmang mi 2-ten chhungkaw pakhat an suam a, hetia an suam lai hian chhan tuma an thenawm pa kal thu chemin an vit a, Clinic-ah an panpui nghal thu hriat a ni a.
Halkha khua, Khaikham khelmual Hall hnuai, Ketheibo Ward-a cheng Pu Duh Awi te chhungkua chu zing dar 1 vel khan tu tih hriat loh suamhmang 2-ten vawm bomb pakhat leh Chemte pakhat kengin an suam a. Hetia an suam lai hian tanpuitu zawnga a au laiin an thenawm Pu Kep Kam lo chhuak chu suamhmang pakhatin a nghawngah chemin a vit ta a ni.
Suamhmang 2 te hian Pu Duh Awi te pawisa, Phone leh rangkachak te an laksak nual thu tualchhung mi pakhat chuan heti hian a sawi a.
“Zing dar 1 vela thil thleng a ni a, Kyats nuai 12, Phone 3, rangkachak thi pakhat leh kuta bun chi pakhat an chhuhsak a. Suamhmang tawk te chhungkua chhan tura kal an thenawm Pu Kep Kam chu a nghawngah an vit a, thisen a chhuah tam avangin Clinic-ah an panpui nghal” tiin tualchhung mi pakhat chuan a sawi a ni.
He, an suamna hmun Ward atanga hla lo teah Khaikham inkhelna Hall a awm a. He Hall-ah hian hman ni lawk atang khan Military council sipaite leh an thawhpui Phyusawhti pawlten buk an khuar nia hriat a ni a.
Tun hnai lawk atang khan Ketheibo khawchhungah Ar bo a tam hle a, sport Hall-ah Military council sipaiten buk an khuar avangin chawhnu dar 6 vel atangin tum ah kan vak chhuak ngam tawh lo tiin tualchhung mi pakhat a sawi a ni.
