Chin State, Halkha leh Thantlang khaw inkar Timit phai chhehvelah July 3 tuka Military council sipaite leh CDF te inbeihnaah CDF sipai 2, ram tan an nunna an hlan a, hliam pawh an awm nual thu hriat a ni a.
July 3 tuk khawvar rual vel khan Halkha leh Thantlang khaw inkar Timit phai chhehvelah Military council sipaiten CDF te awmna nia an rinnaah Jet Fighter-in vawi 2 an bomb hnuah darkar chanve chuang an inbei tawn thu hriat a ni a.
“June 3 khawvar hma atangin min bei tan a, TiDa khua an bomb hnuah Timit phaia PDF camp an bei leh a. Ralthuam lian leh te, nena an beih avangin CDF-Thantlang-a sipai pakhat leh CDF Zophei sipai pakhat ram tan an nunna an hlan a, hliam 7 vel an awm nia hriat a ni a. Military council sipai thi leh hliam zat an tam mai thei a, hriat chian a la ni rih lo tiin CDF te leh chanchin la khawmtute hnen atanga hriat a ni a.
July 3 tuka Military council sipaiten Halkha khuaa independent lungphun atangin ralthuam lianin an kah thu hriat a ni a.
Thla kal ta May 25 atang khan Timit phaitual chhehvelah Military council sipaite leh CDF tangrual pawl te an inkap nasa hle a, May 29,30 leh July 3 pawh khan an inbeih nasat thu hriat a ni bawk.
July 2, zan dar 8:30 vel pawh khan Halkha khuaa BOC office, joint office leh Halkha hospital chhehvelah Military council sipaiten ralthuam liana an kah avangin Hospital-a operation room leh Staff room-ah bomb-in a tihchhiat nual thu tualchhung mi te hnen atanga hriat a ni a.
Tun hnai velah khan Halkha khuaah Military council sipaite leh CDF te inkah buaina awm lo mah se, Military council sipaiten ralthuam lian leh te an kah thin thu hriat a ni bawk.
