Chin State Halkha leh Thantlang khaw inkar Timit phai chhehvela inkahnaah Military council sipai 30 vel an thi a, CDF lamah sipai 10 an boral thu hriat a ni a.
Military council sipai 150 chuangten Halkha khawpui atanga Thantlang khaw lamah pawl 2-a an kal laiin Halkha leh Thantlang khaw inkar Timit phai chuanhnuai leh chuanchungah May 26 atangin vawiin thlengin CDF tangrualte nen an inbeih reng thu hriat a ni a.
He an inbeihnaah hian Military council sipai 27 an thi a, CDF lamah sipai 12 ram tan an nunna an hlan tiin CNF/CNA thupuangtu Salai Thet Ni chuan hetia hian a sawi.
“May 26-a an chhoh hma ni 3 chhung khan kawng sial nan tiin ralthuam lian leh Thlawhnain an bei lawk a. May 26 atang khan an rawn chho tan a, vawiin thlengin kan la inbei reng a. Keini CDF lamah sipai 12 an boral a, sipai 10 vel an hliam bawk. Military council sipaite hi vawiin thleng hian mi 30 vel an thi tawh ang. Kan chhut dan chuan sipai 27 chu kan hre chiang a, sipai 15 vel an hliam niin kan hria” tiin Salai Thet Ni chuan a sawi a.
Ram tana nunna hlan ta CNA sipai 3 leh CDF 9 te hi he inbeihnaa an thiante hliam, chhan tura an kalna lamah ralthuam lianin a fuh avanga boral te an nih thu Salai Thet Ni chuan a sawi zui a.
Military council sipaite hian Timit phai chhehvelah hian ralthuam lian leh Thlawhnain CDF/CNF-te an bomb nasa hle a. Tunah hian Military council sipaiten Thantlang khua thunun leh an tum a, CNF camp hmunpui Victoria camp pawh bei leh tumin an inpuahchah mek thu Salai Thet Ni chuan heti hian a sawi.
“Kumin chhung hian Chin State, Kayin State bakah Sagaing region hmun hrang hrangah chung lam Thlawhna hmangin leh khawmual lam atangin an bei nasa hle tih kan hre vek a. Heng bakah hian kan camp hmunpui Victoria Base pawh bei leh tumin an inpuahchah mek” tiin a sawi a ni.
Timit phaia inbeihnaah hian CNA-te huaihawtnain CDF-Zophei, CDF-Lautu, CDF-Hakha leh CDF-Thantlang te leh CDF tangrualte hian Military council sipaite an beih rawn thu hriat a ni a.
Military council sipaite hian loh theih lovin Thantlang khua luh an tum avangin inbeihna hi a la nasat mai theih thu hriat a ni bawk.
