Sagaing region, Homalin township, Homalin leh PaungPin khaw ramri-a duty Phyusawhti pawlte leh PDF pawl te an inbeihnaah Phyusawhti mi 10 an thih bakah silai 7 an laksak thu Homalin PDF pawlte hnen atanga hriat a ni.
April 28 khan Homalin PDF tangrual pawl, PhaungPin PDF leh NUG PDF pawl ten Chindwin tuipui kama khawchhung then fai hna an thawh laiin Phyusawhti pawlte leh PDF ralthuam keng pawlte an inkahnaah Phyusawhti mi 10 an thih thu hriat a ni a.
He inbeihnaah hian tualchhung Military council sipaite hnen atangin silai 7 an laksak a, sipai thenkhat te chu an rawn inpek thu hriat a ni bawk.
April 29 tuk khan Homalin PDF tangrualten an hual beh mek Homalin township leh Wei He khua te Military council sipaiten JF-17-in an bomb a. Tun dinhmunah hian Homalin leh Phaungpin ramri Chindwin tuipui kam velah boruak a ziaawm thu Homalin People Defence Force-HPDF ten an thuchhuahah an tar lang a ni.
Hetiang vek hian Magwe region, Yesagyo (Yi Sa Chu) township-ah April 30 zing dar 10:45 khan Khah Lah Yah (IB) 258 battalion atanga rin, Military council sipai 40 rual kal Motor 3-te PDF tangrual pawl ten bomb kam hmangin vawi 6 an bomb-naah Military council sipai 2 mit hmuhah an thi a, mi 10 aia tlem lo an hliam thu Yesagyo township PDF pawlten an sawi a.
“Bomb kam vawi 2 kan tipuak a, a vawi 1-naah Military council sipai ration phur Motor 2 beih a ni a, a hnuhnung zawk beihnaah an Motor ke a pawh avangin Military council sipai 2 mit hmuhin an thi nghal a, mi 10 aia tlem lo an hliam a, bomb puak a na khawp mai” tiin Yesagyo NUG PDF thuneitu pakhat chuan Yangon Khit Thit Media a hrilh a.
April 30 chawhnu 2:00 vel pawh khan khawchhung luh tan tirh kawng kawia Military council sipai Motor 2 te an bomb-naah Military council sipai 3 aia tlem lo an hliam thu hriat a ni bawk.
