India, Home Ministry atanga an thuchhuah angin, dan lova Myanmar mi rawn lut te, Bio Data chu July 29 atang khan Manipur State-ah hmalak tan a ni tawh a, kumin September thla chhunga lak zawh theih an beisei thu India news thenkhatah an tar lang a.
Manipur State-ah hian Myanmar mi raltlan mi 35000 chuang vel an awm nia hriat a ni a, Mizoram State-ah pawh Bio Data la turin State sorkarin a inbuatsaih mek thu hriat a ni bawk.
Hetia India-in mihring inthliarna ang dawna a thil tih hi NUG leh Myanmar mi hruaitu thenkhatten an dem nasa hle a.
Manipur State-ah Meitei-ten Zofate awmna an chhuhsak bakah an that a, chenna in an halsak nual thu chanchinbu hrang hrangah tar lan tawh a ni a. July thla chhung khan Myanmar mi raltlan mi 700 te Manipur-ah an rawn lut tiin State sorkar chuan an hnawt chhuak leh a.
Bio Data an tih hi mahni chanchin kimchang, computer hmanga chhinchhiahna kutzungpui nem, hmel leh mit no te thlalak, DNA profile, aw ri leh thil dang te Digidal hmanga record-na a nih thu India For Myanmar-ten an sawi a.
Heng avang hian Bio Data la lo turin leh chen phal lawkna card siamsak zawk tuin UNO-ah an ngen a.
He a ngenna thu hi India hian eng thu mah a sawi lova. Mizoram Chief Minister erawh chuan Mizoram chhung raltlan te hi thawn kirna chungchangah eng mah ruahmanna ka nei lova, India laipuiin min phutna, kumin September thla chhunga lak fel tur a tih pawh hi harsa ka ti khawp mai tiin July 30 khan a sawi a ni.
