Indo-Myanmar, Manipur State, Moreh khawpuiah curfew puan a nih hnuin July 9 khan phelh leh a nih thu District Chairman-in thuchhuah a siam.
Sagaing Region, Tamu township-a zin veivak Indian, Tamil thalai mi 2 thah an nih avang khan Moreh khawpuiah tualchhung mi te leh india mi te intihbuaina avangin July 6 khan curfew puan a ni.
A tul hle loh chuan India mi te Myanmar lama kal tlang phal loh tih a ni a, an kal duh a nih pawhin phalna lehkha ken tel a tul a. Myanmar mi te pawh India lamah an kal dawn chuan kal phalna lehkha a tul bawk a. Mi 5 aia tam awm khawm phal loh a nih thu, thuchhuah an siam.
July 7 khan India Army (Commando) Battalion-te chu Indo-Myanmar, Moreh khawpuiah Duty turin an thleng tawh a.
Hetia curfew phelh leh a nih avangin a lawmawm thu te, ramri inkal pawhna kal tlang leh a nih thu te leh Bungraw thliar luh a theih leh tak avangin engkim a awlsam leh thu Tamu township mi pakhat chuan a sawi.
July 8, tlai lam khan Tamu township, Myoma (Miauh Mah) 12/A, Block, Nanphalong (Nan Pha Lung)-a USDP In 100 lal, U Aung Swe (U Awng Sui) kum 50 mi chu kah hlum a nih thu tualchhung mi pakhat chuan a sawi.
Tualchhung mi pakhat chuan “Zan dar 10 vel a ni a, silai ri hriat a ni a. USDP niin in 100 lal a ni a. a hnuah Military Council lam awnin report a pe thin a, a chenna inah pawh Military Council te an lut chhuak ngun hle a, a chenna in ngeiah kah hlum a ni’ tiin a sawi.
U Swe Aung-a kah hlum chungchanga Military Council ten thu an chhuah dan chuan July 9, zing dar 7:30 khan a chenna inah PDF ten an kap hlum tiin a tar lang nain finfiahna a awm lo.
July 50-a Tamil thalai 2 kah hlum a nih thu-ah Military Council lamtang Phyusawhti (Phiu Saw Thi) pawla Phu Sein leh Zaw Ye te sulhnu niin tualchhung PDF te leh NUG ten an puan angin India News pawhin a tar lang a. Military Council thu puangtu Major General Zaw Min Tun erawh chuan PDF te thiltih niin a sawi thung.
