Sagaing region, Tamu township, India – Myanmar Friendship Road-a awm, Khampat khuaah July 22 atang khan Military council sipai te leh tualchhung PDF te an inkahna avangin In 2000 chuang awmna Khampat mipui te chu a chhehvel ramhnuaiah te, India Manipur State-ah leh Kalaymyo lamah vawiin thlengin an raltlan reng thu Khampat khuaa tualchhung mi pakhat chuan RFA Media a hrilh a.
Khampat atanga Kalaymyo khawpuia raltlante hi mi 1000 chuang vel an ni a, kohhran Biak in hmun 4 velah insem darhin an khawsak mek thu hriat a ni a. Raltlan zingah hian Khampat Children Home atangin fahrah naupang mi 40 vel an tel thu hriat a ni a; India, Manipur State-ah mi 700 chuang vel an raltlan nia hriat a ni bawk.
Tun dinhmunah hian Khampat-ah Military council sipai te leh PDF te an la inkah reng thin avangin raltlante an la haw ngam rih loh thu tualchhung mi te hnen atanga hriat a ni.
Tun thleng hian kohhran hrang hrang, mimal leh pawl hrang hrangten raltlante an theih ang tawkin an la chhawmdawl zel a. An tlanchhuah lai khan hak lai chauh nena tlanchhuak te an nih hlawm avangin silhfen leh ei in bakah ni tin mamawh chi hrang hrang chhawmdawl an mamawh hle thu an sawi bawk a ni.
July 22-a Khampat khuaa inkahna avangin tualchhung mi 2 an boral a, chenna in thenkhat an bomb chhiat nual thu tualchhungten an sawi a ni.
