Sagaing region, Kalaymyo-a awm Ko Nyi Nyi Min leh Ko Nyi Myo Tu te chu military council sipaiten June ni 15-ah PDF mi leh sa tia an man thu tualchhung miten an sawi.
Ko Nyi Nyi Min chu Kalaymyo Myohla venga check thutnaah man niin, Ko Nyi Myo Tu erawh chu Chin-Sai khaw bula sipaiten an man thu sipai lam thlawptu media thenkhatin an tarlang a.
Man tak mi pahnihte chu military council sipaiten Kalaymyo Regional Command Headquarters (RCH) hmunah an hruai tih hriat a ni a, Ko Nyi Myo chu Chin-Sai khaw bul ni lovin, Thu-Hma khaw chhunga man a nih thu a chhung khat hnaiten an sawi thung a ni.
June ni 9 pawh khan Kalamyo Thun Damdawi dawr neitu Ko Phu Toat chu military council sipaiten PDF te ralthuam leisak tia puhin an man a.
May ni 21-ah pawh Kalaymyo Taungphila venga awm Ko Myint Tu Win chu military council sipaiten PDF tanpuitu tiin an man bawk a ni.
Military council sipaite chu Kalaymyo khaw chhung an dap thut thut a, man leh vau hna an thawh deuh reng avangin, mipui lamin an hlau hle a.
Chutih rualin Kalaymyo chhim lamah force tam tak hmanga operation an neih bakah indothlawhna hial hmangin khua leh in an hal chhe reng bawk a.
Sipaiin thuneihna a lak hnuah Kalaymyo chhunga man tawk chu mi 500 chuang niin, tihhlum tawk 100 chuang an awm thu kawngzawh pawl record atangin hriat theih a ni.
