Sagaing region, Kalaymyo khawpuiah April 1 atangin tui thianghlim in tur Liter 20 bur lian pakhatah Kyats 1000 an hralh chhuak ang a, kharchhawng ten Kyats 900-in an lak tawh dawn thu tui thianghlim semtu zinga hnathawktu pakhat chuan March 26 khan an thuchhuahah an tarlang a ni.
Kalaymyo-ah tui thianghlim in tur liter 20 bur lian pakhatah Kyats 700-a an zawrh laiin a siamna hmanrua, diesel man, bur man leh hnathawktu hlawh a san chhoh tak avangin tui thianghlim man a san thu hriat a ni.
Kalaymyo-a tui thianghlim siamna hmuna hnathawktu hmeichhe pakhat chuan “Tunah rih chuan hnathawh hunah current a awm thei lova, Diesel man a san leh avangin harsatna kan tawk a. Hnathawktute inko khawmin rorel kan rel ringawt a, a man a san chhan hi Diesel man a san vang a ni” tiin a sawi a ni.
Tun dinhmunah hian Kalaymyo-ah Diesel Baral khatah Kyats 700000-in an lei thin a, tui thianghlimna siamna khawlah Baral khat hi ni 3 velah an hman zawh thu hriat a ni.
Tun khawhnu hian Kalaymyo leh a chhehvelah tui thianghlim an hmang nasa hle a, ei rawngbawlnaah tui pangngai aia tui thianghlim hmang an nual tawh thu hriat a ni bawk.
“Hetia tui thianghlim man sang mah se, loh theih lohva lei a tul dawn thova. Tun hmain tui pangngai kan hmang thin a, chinai a tam avangin tui thianghlim kan hmang tawh a, sum lamah harsatna kan tawk nasa khawp mai” tiin Kalaymyo-a chhungkaw nu pakhat chuan a sawi a ni.
Tui thianghlim in tur, hmangtu ten ni khatah liter 20 bur lian 2,3 an hman thin thu hriat a ni a.
Kalaymyo leh a chhehvelah Tawng Zalat, New Life, CARMEL, WESLEY, Shwe Kalay, Mya Nadi, Kyan Mar Chan Thar, Nan Khiang, B2 leh Nan Htite Saan ten tui thianghlim siamna khawl 10 hmangin an sem thin thu hriat a ni.
