Sagaing region, Kalaymyo hmar lam, Tahan atanga Letpanchaung khaw panna kawngah August 8, chawhnu dar 1 vel khan bomb phuak avangin tualchhung mi pakhat a boral thu hriat a ni a.
Tahan-Kalaymyo atanga Letpanchaung panna kawnga awm, Tlangzawl khua thlanmual bula bomb puak avangin mi 3 an hliam a, DuWinChaung, Varpui khuaa kum 18 mi Lalpianpuia chu bomb puakin a hliam nasat vangin August 8, chawhnu dar 2:40 khan a boral thu tualchhung news Zofa Journal chuan a tar lang a ni.
Lalpianpuia hi Tuingo ( PinTawU) khua atanga Bawng la haw, NyiaungTaw (Tlangzawl) khua, thlanmual bul kawnga bomb kam chu, a Bawngin a rah puah avangin an hliam thu hriat a ni a.
Hliam mi 3 zingah hian Lalpianpuia hi a hliam na zual deuh avangin a boral a, mi dang hliam 2 te erawh damdawi inah enkawl mek an ni a, bomb rap puaktu Bawng pawh a dinhmun a derthawng avangin an talh nghal thu hriat a ni bawk.
Tahan,Kalaymyo atanga Letpanchaung panna kawng hi Kalaymyo hmar lama inkal pawhna kawngpui lun ber a nih angin ni tin mihring leh lirthei veivak an awm reng thin a. Tuna bomb puak ta hi tute bomb kam nge tih hriat chian a ni lo.
