Sagaing region, Kalaymyo chhim lam TaSi khuaah April 12 tuk khan Military council sipai ten Kalay PDF mi 10, an man thu Kalaymyo PDF pawl ten an sawi.
PDF te an man lai hian an hmachhawn ve nain Military council sipai te an tam hneh em avangin an chet theih loh thu Kalay PDF thupuangtu chuan RFA Media a hrilh a.
“Military council sipai ten enthlatua an dah ten an report angin April 12, zing dar 3:00 vel khan TaSi khuaa an awmhonaah an man a. An chhang let nain ralthuam hman a inthlauh avangin mi 10 an man a. An zinga pakhat a hliam a, ralthuam an laksak nual bawk”
Military council sipai ten social media-a an tarlan dan chuan ralthuam telin motor pakhat leh ruihhlo an man nual thu an tarlang nain Kalay PDF te erawh chuan ruihhlo a tel loh thu an sawi bawk a ni.
Heng an man tak PDF mi 10 te hi Kalaymyo Military hmunpui Dah Kah Sah (Regional Command Headquarters)-ah an khung khawm thu tualchhung mi ten an sawi.
Tun dinhmunah hian Kalaymyo khawpui chhungah ATOM, Ooredoo leh Mytel phone signal leh internet a hman theih loh angin MPT phone signal pawh a hman thei lova, a hnu leh zelah eng ang dinhmun nge kan tawn dawn kan hre lo tiin tualchhung mi pakhat hnen atanga hriat a ni bawk.
He buaina chungchangah Sagaing region, Military council thupuangtu Immgration Minister U Aye Hlaing, phone-a an zawhnaah chhana a awm rih lo a ni.
Political prison (AAPP) ten kum 2023 April 11-a an thuchhuah dan chuan Military council sipai ten thuneihna an lak hnu hian mi 21334 an man tawh thu an tarlang a ni.
