Sagaing region, Kalaymyo township chham, May ni 31 leh June 1 chhunga military council sipaite leh tualchhung PDF tangrual pawlte inkahna chhuakah military council sipai 7 an thih thu Chin National Defense Force (CNDF) pawlin thuchhuah an siam.
CNDF thupuangtu chuan, “Military council sipaite chu Natchaung khuaa high school leh Aung Suh Pan puithiam school-ah an inkulh a. Chu chu keini CNDF, PDF (Kalay), RKDF leh tualchhung PDF tangrual pawlin May ni 31-ah kan bei a, kan inkap vak a ni,” tiin a sawi.
Chubakah Natchaung khaw chhungah pawh June ni 1 zing lam dar 8 atanga zan lam dar 6 vel thleng inkahna chhuak nasa hle a, ni 2 chhunga inkahna chhuakah military council sipai 7 an thih thu a sawi bawk a.
Military council lam laipui puak mu perin PDF (Kalay) sipai pakhat tihlumin, pakhat a hliam a. CNDF sipai pakhat pawhin hliam a tuar bawk a ni.
Military council sipaite chu June ni 1, chawhnu lam atangin Natchaung khaw chhunga chenna in awmte an hal a, May ni 31-ah pawh laipui an tawng pawng kah chhuah vak avangin, Nat-Miaung puithiam school chhunga raltlan civil mi 7 te an kap fuh a, pahnih chu an ngaihtuahawm hle.
Chu mi inkahna chungchanga thi leh hliam dinhmun chu sipai lamin thuchhuah an la siam lo bawk a ni.
