Sagaing region, Kanbalu township-ah Military council sipaiten an luh chilh vangin chenna in an hal nual a, tualchhung mipuite an tlanchhiatna hmunah rulin mi 61 a chuk tawh a, naupang telin mi 6 an boral tawh thu tualchhung miten Mizzima Media a hrilh a.
Rulin an chuk hlum mi 6 zinga mi 2 te chu ramhnuaia awm inenkawlna neih loh avanga boralte an nih thu tualchhung mi pakhat chuan Mizzima Media a hrilh a.
“April thla khan mi pakhat, nikum fur lai khan naupang 2, nikum kum chawhnu khan kum upa pakhat leh hemi hma fur laiin mi 2, an vaiin mi 6 an boral tawh” tiin tualchhung mi pakhat chuan a sawi a ni.
Tualchhung tlawmngai pawl leh Health worker-ten an chhinchhiah dan chuan kum 2021 chawhnu leh kum 2023 April thla thleng khan Kanbalu District-ah mipa 45, hmeichhia 16 rulin a chuk tawh a, heng zingah mi 6-in nunna an chan tawh thu an tar lang a ni.
“Rul chuka boral ta te hi kum 8-60 mi inkar te an ni hlawm a. Military council sipaiten an luh chilh avanga an tlanchhiatna lamah rulin a chuk hlawm a, zan curfew a nih avanga Clinic-a panpui thei lo an nih avanga boralte an ni a, mi dang 2 te chu enkawl laia boralte an ni” tiin tualchhung mi dang pakhatin a sawi.
Kanbalu township-a ALeKhone,ShawPhyuKone, KanGyi, SinKaung leh WatTeIn khuate hi rul chukna hmunpuite an ni a; heng zingah AleKone khua hi rul chuk hluarna ber khua a nih thu hriat a ni bawk.
Sagaing region, Kanbalu District-ah Military council sipaiten an luh chilh avangin raltlan an tam hle a. Heng raltlante hian ei leh in, silh leh fen, hriselna lamah mamawhna a sang chho zel a, an awmna chhehvelah rul nen an la hmachhawn zel thu hriat a ni bawk.
Tun dinhmunah hian tualchhung mipuiten rul chuk damdawi leh hriselna lam an mamawh hle thu hriat a ni a. Hmanni lawk April 11 tuk pawh khan Kanbalu township, PaZinGyi khuaah Military council sipaiten bomb an thlak avangin tualchhung mi 150 aia tlem lo an boral tawh bawk a ni.