Sagaing region, Katha township, Inn Ywa (In Zua) khaw bulah April 4 khan Military council sipaite leh PDF te an inbei a. Military council sipai ten an bomb-naah naupang pakhat a hliam a, Khaw 10 chuanga tualchhung mipui Singkhat (10000) chuang an tlanchhiat thu tualchhung mi ten an sawi.
“An inkahna avangin Khaw 10 chuang, a khawpum mi 10000 chuang an tlanchhia a. Khaw khata In 500, 200 vel awmna mi te an tlanchhuak vek a, ramhnuaiah tanpuitu awm lovin an khawsa nawk nawk a, ei in leh mutbu an mamawh khawp mai”
April 4, chawhnu khan Inn Ywa, Pyi Lan Kone leh Kyun Taw (Chun Taw) khaw kianga an inkah hnuah Military council sipai ten Jet Fighter-in an bomb a. April 5 pawh khan Pyi Lan Kone khua leh Kyun Taw khuaah Military council sipai ten chenna in an hal nual thu Katha tualchhung mi pakhat chuan RFA Media a hrilh.
“April 4 zan khan Thlawhnain Pyi Lan Kone khua leh Kyun Taw Kone khua an bomb a. April 5 tuk khan a Khaw hnihin an hal a, tualchhung mipui an hliam lova, an tlanchhuak vek”
April 4 chawhnua Inn Ywa khaw kianga inbeihnaah Military council sipai 30 vel an thih thu tualchhung mipui ten an sawi a; Mahse RFA Media ten nemnghehna an la nei rih lo.
He inbeihna chungchangah Military council ten thuchhuah an la nei lova, Sagaing region, Military council thupuangtu RFA Media-in a phone-naah chhanna a awm rih lo.
Sagaing leh Kachin ramri Katha, Ban Myauk, SweKu township-ah March chawhnu vel atang khan Military council sipaite an chet nasat thu PDF ten an sawi.
Sagaing region chuanchung Katha township bakah Katha ramri Tigyaing (Thi Chiant) township velah inkahna a chhuak fova, Military council sipai ten chung lam Thlawhna atangin an bomb nual thu tualchhung mi ten an sawi bawk a ni.
