Sagaing region, Kawlin towndsip-ah Military council sipaiten KIA officer Zaw Saing telin PDF mi 10 te an man hnuah rawng taka thah an nih thu KIA news chuan a tar lang a ni.
April 26 khan Kawlin township PyipinChaung(Pi Pin Chhawng) khaw chhehvela innghat KIA leh PDF zinga mi 10 te Military council sipai operation pawl 2-a kalten dang betin an man a. KIA officer Zaw Saing leh revolution sipai pakhat an camp pawnah an chhuah laiin Military council sipaite nen a intawk thut a, rawng tak an thah nghal thu hriat a ni a.
“An that ngei tih a chiang a, rawng tak leh rapthlak takin an kap hlum a. An sawisak hlum theih loh te an hal hlum bawk” tiin KIA news chuan a tar lang a ni.
April 27 khan PyipinChaung khuaah Military council sipaiten an luh chilh a, PDF mi 8 te an man hnuah an thah vek thu hriat a ni bawk.
“Inkah buaina a awm hran lova, duty-a an awm laiin Military council sipaiten an bei ringawt a. PDF mi 8 Military council sipaiten an man hnuah rawng taka an thah vek thu hi thu dik a ni” tiin KIA news chuan a tar lang a ni.
