Kayah State, Loikaw (Luai Kaw) township, Demoso (Di Mawh Su) khaw kawnga khaw thenkhatte January 24 atang khan Military council ten operation an neih avangin tualchhung mi 3000 chuang an tlanchhiat thu Kayin Ni, human right director Ko Ba Ngyan chuan RFA Media a hrilh.
“Loikaw leh Demoso ni chhuakna lam an rawn tuam a. Za Lat Phiu khua leh Chauh Maing tract, Nan Hu Thui Pa Aing khuaa mi te an tlanchhe vek a ni”
Military council ten Demoso ni chhuakna lam khuate an operation avangin tualchhung mi an tlanchhe vek a. Heng avang hian raltlan mi 3000 chuang an pun phah a, kawng kama awm sa raltlan mi 1000 chuang nen Demoso ni chhuahna lamah an tlanchhiatho thu Ko Ba Ngian chuan a sawi.
Raltlante tan hian Silpaulin, thutna tur leh ei in tur bakah mamawh chi hrang hrang tanpui an ngaih thu a sawi bawk.
Revolution te chet thatna Demoso khua, Pha Ru So township , Shia Daw township ,Baw La Khe township te February 2 khan Military council ten Martial law an puang tawh a. Military council sipai te an chet zel chuan raltlante tan an harsa lehzual dawn a ni tiin Ko Ba Ngian chuan a ngaih dan a sawi bawk.
Military council ten thuneihna an lak hnu kum 2 chhung hian Kayah State-ah raltlan mi Nuai 2 chuang an awm tawh a ni.
Kayah State-a raltlan chungchangah Kayah State-a Military council thupuangtu Immigration Minister U Aung Win Oo (U Awng Win U) RFA Media-in an phone-naah chhanna a la awm rih loh a ni.
Military council ten thuneihna an lak hnu hian Shan State chhim lam Moe Be khua, Phe Kon khua leh Kayah State-ah Military council sipaite leh Kayin Ni PDF tangrual te nen vawi 562 an inkap tawh a, tualchhung mi 430 an boral tawh thu PKPF ten February 1 khan an thuchhuahah an tarlang. Boralte zingah Military council ten an thah mi 302, raltlan avanga boral mi 128 an awm thu PKPF ten an tarlang bawk a ni.