Sagaing region, Khin U township-ah May 7 atangin June 14 thleng, thla khat chhung khan Military council sipaiten khaw 11-ah chenna in 596, an hal chhiat thu Khin U khuaa information-ten an tar lan thu hriat a ni a.
Khin U khawpuia mi pakhat chuan “Keini township chu Sagaing region-ah a beih nasat ber pawl tak kan ni a, Military council sipai officer te an thi tam tawh khawp mai. Kan ram chinah bomb kam leh sniper avangin Military council sipai thi leh hliam an awm thin a; Chuvangin, Military council sipaiten min bei fo thin a ni ang” tiin a sawi a ni.
Thla khat chuangah hian KaBok khuaah in 150, KokThet khuaah in 30, YaungPin khuaah in 24, TinPaung khuaah in 12, TaYetKone khuaah in 12, MoeNat khuaah in 7, YwaThit khuaah in 7, YeAye khuaah in 4, Aung Chhan Thar khuaah in 3 leh TaungBoh khuaah in 2 te an hal thu hriat a ni a.
Khin U township-ah hian Military council sipai Khah Lah Yah (IB) 701, 361-te leh Phyusawhti sipaite nen 300 chuang vel an awm thu PDF zinga mi pakhat chuan a sawi a.
Military council sipaite hian Khin U township-ah YwaThitKone khua, MaKyiKone khua, MaDaungHla khua, PyiThoung khuaa Phyusawhti pawlte, ral kah dan an zirtir bakah ralthuam an pek thin thu an sawi bawk a ni.
