Tit-Baw-Boee military council sipai camp atangin ralthuam tam tak laksak a nih thu leh sipai 6 a nung chunga man niin, KNLA lamah pawh 2 thiin, 6 an hliam thu Karen National Liberation Army pawlin an sawi.
He mi chungchang hi military council lamin thuchhuah engmah an la siam lova. KNLA lam tarlan danin, Myawaddy khaw chhim lam Lee-Ke-Kaw Wa-Le kawng lama awm Tit-Baw-Boee khaw bula inkulh sipai camp chu May ni 17 zan atangin KNLA/KNDO tangrual pawlin an bei a. An inkap tawn nasa hle a, May ni 18 zing lamah military council sipai camp chu laksak theih a ni.
Sipai camp laksak hnuah pawh military council lamin van boruak lam atanga an la rawn beih zui avangin, hliam an awm thu KNLA lamin an sawi a. Chu sipai camp atangin ralthuam tha hnem tak laksak a nih thu pawh hriat a ni.
KNLA operation lam source chuan, “Military council sipaiho camp kan laksakna lamah ralthuam thahnem tak leh sipai 6, a nung chungin kan man a. Kan endik a, kan chhinchhiah zel bawk a. Thuneitu lamin sipai thi zat leh tlanchhiate thenfai hna an thawk chhunzawm bawk a. Nimin lama inkahnaah KNLA tangrual pawla mi 2 thiin, 3 an hliam a. Zing lam dar 2 velah darkar 2 chhung indo thlawhna hmangin min rawn kap a, pathum an hliam. Chung hliam zinga pakhat chu a ngaihtuah awmin damdawi hmanga enkawl mek a ni a. KNLA/Cobra Column commander a kutah a intihliam a, mahse ngaihtuahawm a ni lo,” tiin a sawi.
KNU brigade control area chhungah military council sipai camp 10 aia tam a la awm a, inkahna pawh a chhuak deuh reng a. Chuvangin, tualchhung mi sing 7 chuang chu ramri, Thailand lamah an ratlan mek a ni.