Bago region, Pyi Myo (Pi Miauh) kum 19 Jail tang tura an hrem mek NLD region/state MP U Kyaw Ze Yah chu a thubuai awrh belh 2 hmangin thi tura a chungthu rel theihna dinhmunah a din thu a chhungkhat hnaivaiten May 16 khan RFA Media an hrilh a.
Ram tibuaitu nia puhna section 49 (A), case 2 hmangin thubuai an awrh belhtir leh a; he thubuai 2 zawt fiah turin May 19 hian Court-ah an inlan dawn thu hriat a ni a, hetia Court-a a inlanna turah hian a chhungten an thlaphanpui hle thu an chhung hnaivai zinga mi pakhat chuan heti hian a sawi.
“Kum 19 Jail tang turin an hreng tawh a, tunah thubuai 2 an awrh belhtir leh a, Ukil rawih dawnin a harsat bawk si a, Ukil kan mamawh hle a ni” tiin a sawi a ni.
Eng vang nge hetia thubuai an awrh belhtir leh tih hi a chhan leh vang kan hre thei lo a ni tiin a sawi zui bawk a.
U Kyaw Ze Yah hi kum 2022 December 12 khan Pyi Myo Jail-ah ram tibuaitua puhna section 505 (A) case leh 130 (A) te, boruak tichingpengtua puhna section 25 bakah ruihhlo case leh case hrang hrang case 6 hmangin kum 19 Jail bang zut tura hrem a ni tawh a.
U Kyaw Ze Yah hi kum 2022 June 9 khan Military council sipaiten an man a, Yangon Ye Kyi Aing-a sipaiten an dawpna hmunah leh Pyi Myo-a sipaiten an dawpna hmunah thla 2 chhung an sawisak thu a chhung hnaivaiten an sawi a.
U Kyaw Ze Yah kum 2015 leh 2021 inthlanpuiah khan Bago region, Pyi Myo township, Region/State PM atan tum 2 thlan tlin a lo ni tawh a. Kum 2020 inthlanpuiah 82.4 %-in hnehna a chang a, Vote tihchingpen a ni tiin Military council-ten an hnawla heti hian thuneihna an la ta a ni.
Kum 2023 January 5 thlenga hriat danin Military council-ten thuneihna an lak kum 2 hnu hian NLD Party MP, MLA mi 124 an man tawh a, heng zinga mi 80 te hi Jail-ah khung mek thu hriat a ni bawk.
