Myanmar ram pumah nikum lama academic session chhunga bomb-a tihpuah leh meia hal chhiat school (zirna in) 504 chuang awmin, zirtirtu 37 an thih thu military council thupuangtu Deputy Minister, General Zaw Min Tun chuan May ni 19, Naypyidaw-a press conference-ah a sawi.
General Zaw Min Tun chuan, “Kum hmasa lam academy session chhungin firfiak pawlte chetna bomb puak leh meia hal chhiat zirna in 504 a awm a. Zirtirtu 37 an thi a. Tunah pawh school hawn a nih hmain in rikrapna a thleng leh tan tawh a ni,” tiin a sawi.
Ani chuan ram chhung hmun hrang hranga school-ah bomb kam, bunker siamin firfiak mipui sipaite an inkulh thu a sawi bawk a.
Mahse, a nihna takah chuan military council sipaite chu school, puithiam zirna in, puithiamte pawh tiamin, khua an hal chhia a, primary school naupang thlengin an man bawk a ni.
Khawpuia zirna inah pawh military council sipaiten bunker siamin sipai camp an dah a. National Unity Government (NUG) ruahman education program chungchangah sipai thupuangtu General Zaw Min Tun chuan press conference-ah a sawisel tel bawk a.
Ani chuan, “Zirna nena inkungkaihin mipui zawng zawng fimkhur tura ka sawi duh leh ka entir duh che u thil pakhat a awm a. He lamah chuan school kal lo turin an sawi a. Leh lamah chuan lehkha an zirtir an ti leh a. Chutah chuan eng thil nge inphum tih chu kan en chian chuan kan hmu thei ang,” tiin video on-in a sawi a.
Chu military council lam video siamrem sa, Zaw Min Tun-an press mite an entir chu Free Online Educational Institution Myanmar leh Islamic Organization Myanmar te a sawi tumna a ni a.
Ani chuan, “Heta a sawi IOM chungchang hi a ni. Hei hi khu lama awm PDF pawl pakhat a ni. IOM tih lampum chu kan sawi tawh lovang, a awmzia nen lam lo chair mai ru. Chu mi atangin zirtirna pek a ni ang tiin a sawi a. Chuta tel lesson-te chu Koran, Hindu tawng, Arabi tawng te a ni a, a bak chu lo en zui mai rawh u. A nih chuan anni ho sawi zirna (education) tih chuan enge a kawh tak ang,” tiin a sawi.
IOM facebook-ah chuan anin Myanmar tawngin international zirlai (curriculum) hrang hrang chu online atanga an zirtir bakah computer, English tawng te pawh an zirtir nia tarlan a ni.
Mahse, General Zaw Min Tun chuan Islam sakhuaa zirtirna (lesion) te chu kawhhmuhin National Unity Government-in he te hi a zirtir dawn nia puhin a sawi thung a.
Chubakah, ani chuan mipui venghimtu pawlten zirtirna chawkbuai leh school-a inkulh angin a puh bawk a ni.
Myanmar ram puma zirna inah sipai bawih zirtirna dodalin zirtirtu, education department staff ten sipai thuneihna dodalin CDM movement-ah an tel a, chutiang bawkin, zirlai tam tak pawhin zirna inah kal lovin, dodalna an la lantir reng a ni.