Kayin State, Kyainseigyi township leh a chhehvela inkahna avangin khaw 20 chuanga tualchhung mipui 17000 vel in leh hmun ram a tlansan thu UN chhawmdawltu pawl UN OCHA ten February 8 khan an thuchhuahah an tarlang.
Kum 2022 December thla ral atang khan he hmunah hian Military council te leh KNLA te nasa taka an inkah avangin security leh UN chhawmdawltu pawl ten an hlauhthawnpui thu UN OCHA ten an sawi.
In leh hmun ram chhuahsan mi 17000 vel hi tunah hian Thai leh Myanmar ramri hnaih, ramhnuaiah an tawm rih a, ei in leh damdawi bakah tawm hulna tur an mamawh hle thu an tarlang bawk.
Kayin State leh Kayah State chhehvela check gate-ah security an dah uluk avangin hmun hla atanga raltlante chhawmdawlna pekna turah an harsat thu an sawi bawk a ni.
UN OCHA te chhinchhiah dan chuan rampum huapa in leh hmun ram tlansan mi Maktaduai 1.5 an chuang tawh a, Military council ten thuneihna an lak hnu hian in leh hmun ram chhuahsan mi Maktaduai 1.2 an awm tawh a ni an ti.
Kum 2022 khan mangangte chhawmdawltu pawl Humanitarian partner ten rampum huapa chhawmdawl ngai mi maktaduai 4 chuang hnenah tanpui an mamawh thu an tarlang bawk.
Tun dinhmunah hian mipui maktaduai 17.6 (Rampum mipui hmun 3 then hmun 1) chhawmdawl an ngaih thu UN OCHA ten an sawi.
