Chin State, Kanpalet township, Chin Dui khuaa Military council sipai camp, CDF-Kanpetlet ten March 11 khan an luhchilh a, Military council sipai 5 an kah hlum thu hriat a ni.
Chin Dui khawpuiah Military council sipaite camp, March 10 zan khan an pan hnaia, March 11, zing dar 6-7-ah tum khat, dar 7-10:30-ah tum khat an beih thu CDF-Kanpetlet ten an thuchhuahah an tarlang a ni.
“Thi zat hi chiang taka hriat theih a ni lova, sniper-a an kahnaah Military council sipai 5 an thi a. Rangva inhungna inah kan kap a, tum mah chhuak hmuh tur an awm lo, Hei ai hian thi leh hliam an tam mai thei” tiin CDF-Kanpetlet pawla thuneitu pakhat chuan a sawi a ni.
He inbeihnaah hian Military council sipai ten ralthuam lian 60 MM leh RPG ten an kap a, PDF lamah thi leh hliam awm lovin an kirsan thu hriat a ni.
Military council sipai 70 rual te Chin Dui khaw laili Kyintu (Chin Tu) camp-ah an awm thu hriat a ni a.
Kanpalet township hi Military council ten Martial Law an puanna khua a ni a. Military council sipai ten Chin Dui khawchhungah luh chhuah an phal lova, phone an kharsak mek a, khawchhung mi te, in biak pawh an la harsat mek thu htiat a ni.
Chin Dui khuaa inkahna avangin tualchhung mi zaa 30, an tlanchhe nual tawh a, PDF ten an buatsaihna hmunah raltlante an la awm thu hriat a ni..
