Malaysia Perak State Ipoh khuaah phalna nei lo Myanmar mi 30 chuang an man thu immigration office atangin thu an chhhuah an ni. Heng an mi man te hi mihring hmanga sumdawng mi ten an hruai te an nih thu hriat a ni.
Malaysia, Kuala lampur khawpui hmar lam mel 100 vela hla Perak State, Ipoh khuaah Myanmar chaw dawr hmun pakhatah March 8 zan khan tualchhung police te leh immmgration ten an hup thut a.
Kawngkhar an hawnsak duh lawk lova, an chhut bal hnuah in chhunga mihring hmanga sumdawnna atana an hruai Myanmar mi kum 18-45 inkar mipa 26 leh hmeichhia 4 te an man thu Malaysia-a active ve tak Ko Sor Thet Thein chuan heti hian a sawi a ni.
“Ni 6 vel liam taah khan Agent ten mi 20 vel Malaysia-ah an thawn tawh a. Heng an man zingah hian Rakhine mi te an tam ber a, Rakhine chaw dawr leh Burmes dawr pawh a awm a. An man te hi mi 20 leh thleng hmasa mi 20 te an ni a, mipa 26 leh hmeichhia 6 an ni a, an manna hmun In hi ni 6 khan an lut tawh a, ni 8-ah an man” tiin a sawi a ni.
Malaysia-a Myanmar mi hnathawk tura thleng te hi Myanmar mi awm sa ten duhsakin hna an zawnsak thin thu a sawi zui bawk a ni.
“Burmes chaw dawra thil thleng chungchangah Agent te an inhmun khawm hlawm a. Heng an man te hi Malaysia-ah an luh theih chuan Myanmar mi ten hna an zawnsak dawn a ni”
Perak State-a immigration director-in a sawi dan chuan Perak State-ah Malaysia immigration te nen officer 18 an tel thu a sawi a ni.
An hup lai hian Myanmar mi ten tlanchhuah tum mah se, an hual beh tlat avangin an man a. Human trafficking te hmun pakhat a nih thu immigration ten an thuchhuahah an tarlang a ni. Heng Myanmar mi an man te hian passport nei lovin an luh thu Malaysia sorkar chuan a sawi a, immigration dan anga hrem an nih dawn thu a sawi zui bawk a ni.
An man tak Myanmar mi 30, Malaysia hruai thlengtu mihring commission Myanmar mi pakhat pawh man tawh niin zawh fiah mek a nih thu Malaysia news chuan an tarlang a ni.
