Manipur State-a Zofate an sawisaknaah Mizoram mipuiten July 25 khan tawrhpui nan kawng an zawh thu hriat a ni a.
Kawngzawhnaah hian Mizoram State-a NGO pawl lian tak Central Young Mizo Asso ciation(CYMA), Mizo Upa Pawl(MUP), Mizo Hmeichhia Insuihkhawm Pawl(MHIP), Mizo Zirlai Pawl(MZP), Mizo Student Union (MSU) tangrual NGO Cordination Committee-ten an huaihawt a, Aizawl khawpui bakah Mizoram khawpui hrang hrangah mi a nuai telin kawng an zawh thu hriat a ni a.
Kawngzawhna function-a huaihawitu ber Central Young Mizo Association (CYMA) President R.Lalngheta chuan “Manipur-a kan unauten harsatna an tawrhnaah kan tawrhpui tak zet a. Manipur sorkar hian a veng hneh lova, kan chipuite an that a, Biak in leh In tam tak an hal a, hmeichhia saruakin rawng takin an that bawk a, hriat thiam har kan ti khawp mai” tiin a sawi a. India sorkar laipui hian a rang thei ang berin ching fel thuai rawh se tiin a sawi zui bawk a ni.
Manipur State-a Meitei-ten Zofate an suasamnaah hian Biak in 150 chuang an hal chhe tawh a, mi 130 chuang an thah tawh thu Indigenous Tribal Leader’ Forum (ITLF)-ten an sawi a.
Heng bakah hian tun hnai lawk khan social media-a Zo hnahthlak hmeichhe 2, ruaka rawng taka thattu chu Meitei-ten an man tawh thu an tar lang a.
He buaina chungchangah Manipur State, police station-ah theh luh tawh a ni a, thla 2 chhunga eng thu mah bawh zui an nih loh avangin hetia kawngzawh boruak thleng hi a ni a, khawvel hriatah puan darh a ni ta a ni.
