All India Radio News Aizawlin a tar lan danin India, Manipur State atanga sa himna zawnga Mizorama raltlan awm zat chu mi 8,878 a ni a, hei hi June 4, 2023 tlai dar 5 thlenga hriat theih chin te an nih thu hriat a ni a.
Home department hotute hnen aţanga thu dawn danin Zirtawpni tlai dar 5 leh Inrinni tlai dar 5 inkar khan Champhai district-ah mi 17 an rawn luh belh a. District 9 dangah luh belh an awm lo. Kolasib district-ah Manipur raltlan hi an tam ber a, mi 3,266 an tling tawh a. Aizawl district-in dawtin mi 2,889 an awm mek a. Saitual district-ah mi 2,249 an awm mek bawk.
May ni 3 atanga Manipur buaina avanga Mizorama sa himna rawn zawng te hi tun dinhmunah hian Kolasib, Aizawl, Saitual leh Champhai district bakah Lunglei, Mamit, Serchhip, Khawzawl, Hnahthial leh Siaha district-ah te an awm mek a. Lawngtlai district-ah chauh an awm lo a ni. Lawngtlai district-ah hian Myanmar lam atanga raltlan mi 5,701 leh Bangladesh rama Chittagon Hill Tracts atanga raltlan 772 an awm mek thung a ni.
Home department hotute sawi danin Manipur buaina avanga an sa himna zawnga Mizoram a lo tlanchhia thenkhat chu Manipur lamah an kir leh nual tawh a. An rawn tlanchhiatsan khuate a ralmuan leh tak deuh avangin an kir leh nia thudawn a ni.
Manipur atanga raltlan lo lutte hian Manipur-a an ration card hmangin Mizoram-ah ration an la thei a. Zirlai sikul kal chhunzawm duhte tan pawh ruahmanna siamsak an ni bawk.
