Chin state chhunga awm Mara hnam chenna khaw 50 chuangah primary school hawng thei turin Mara Administrative Territorial Council – MATC) chuan ruahmanna siamin zirtirtute tana training pawh zawh fel a nih tawh thu hriat a ni.
Maraland Administrative Council hnuaia education board kaihhruainain National Unity Government zirlaite zirtir thei turin primary education teacher training chu June ni 13 atanga ni 24 thleng trainee 100 te trained an nih tawh thu Maraland Administrative council secretary U Khai Sa chuan heti hian a sawi.
“Tuna ram chhung indona kum 2 chhungin, naupangte zirna lamah harsatna a awm avangin, a taka zirna mamawh naupang te leh zirlai nu leh pate ngenna nasa taka vangin Maraland Administrative Council chuan Education Broad chu mawhphurhna pein, a vawi khat nan training tawi, June ni 13 atanga ni 14 inkar Teacher training chu kan ruahman ta a ni.”
Mara hnamte chu Chin state Thantlang, Matupi leh Paletwa township, township 3-ah an awm darh a, khaw 64 an luah nia hriat a ni. Tunah chuan khaw 7-ah school hawn a ni a, kaw tam zawkah pawh nakin rei lotea hawn theih a nih tur thu Maraland Administrative Council chuan a sawi a.
Zirtirtu indaihna lohna hnawh khat thei turin University student, pawl 10 pass tawh zirlaite chu Teacher Training kaltirin tunah chuan zirtirtu mamawh zat zaa 70 vel an awm tawh a ni.
Township 9 awmna Chin state-ah military council-in Hakha, Falam, Tedim, Tonzang leh Paletwa khuaah June thla tir atangin zirna in a hawng tan a, mahse state puma school naupang lut zat chu sing chuang vel lek an ni a. Chin state-a mipui tam zawkin military council hnuaia zirna system chu an dodal tlat a ni.
