Chin state Mara land chhunga mipui inrelbawlna hna chak zawka kalpui a nih theih nan khaw lal (administrator)-te chu July thla tawp lam atangin suma tanpuina pek a nih tur thu Maraland administration council – MATC chuan thuchhuah a siam.
A vawi khatna Mara People Conference thutlukna siam angin Maraland Administration Council huam chhunga inrelbawlna chak zawka kalpui a nih theih nan circuit 6-a khaw 64 chhunga administrator zawng zawng chu July ni 30 atanga December ni 30 thleng thla 6 chhung, office-a hman tur leh thil tul dang hrang hranga hman tur, thla khatah India pawisa cheng 1500 (Kyat 50000 vel) pek a nih tur thu MATC hruaitu pakhat chuan heit hian a sawi.
“July thla a tawp chuan People conference term khat chhung, July atanga December thla thlengin, circuit administrator 6, village administrator 64 te chu keini lamin India pawisa Rs. 1500 theuhin thla tin tanpuina pe tura thutlukna siam a ni.”
Maraland-in a huam chu Chin state, Thantlang, Matupi leh Paletwa township 3 chhunga awm Mara hnamho chenna khaw niin, khaw 64 vel a awm thu hriat a ni.
Tunah pawh Maraland huam chhunga awm khaw 50 chuangah MATC kaihhruainain Middle school thleng hawn theih a nih tawh thu heti hian a sawi bawk a.
“Khaw 64 awm zingah khaw 52-ah middle school hawn theih a ni tawh a, zirlai 3000 chuang an awm a. CDM zirtirtu 50 leh volunteer mi 150 vel an awm bawk a ni.”
Maraland chhunga naupangte zirtirtu CDM-te chu thlakhatah Kyat nuai khat tanpuina pek an ni a, volunteer-a thawkte chu Kyat sing 7 pek a nib awk thu hriat a ni.
