Chin state Matupi khuaa military council hrenbeh Pastor pakhat telin Chin thalai 9 te chu May thla tawp lam leh June chawlhkar hnihna vel chhungin hun rei taka tang tura an chungthu rel a nih hlawm thu hriat a ni.
Matupi khuaa CDF leh CDM zawm sorkar hnathawkte tanpuitu tia puha man tawk Pastor Kap Thang leh pawisa thleng kualtu U Aung Ko te pahnih chu military council-in June ni 13-ah kum 15 tang tur leh hna rim thawk tura an chung thu a rel thu felt hu Matupi Times editor-in a sawi a.
Ani chuan, “Pastor leh U Aung Ko chu pawisaw thawn kual, Yangon lama thawn chhuah an nei a, chu chu CDF te tanpuina a ni tiin an pahniha man an ni. An chung thu rel a nih ni tak hriat mai a ni lova, nimin piah lamah an paniha kum 15 tang tur leh a hmain mi dang pawh an lo relfel tawh thu hriat a ni,” tiin a sawi.
Pastor Kap Thang chu Matupi township Changpiang khuaa Gospel kohhran pastor a ni a, U Aung Ko chu Matupi khaw chhung Sa-Bawng venga pawisaw thleng kual hna thawk a ni.
Anni pahnih chu kum 2021 December thla tawp lamah CDF leh CDM staff te tanpuitu tia puhin military council-in an man a.
Pastor Kap Thang leh U Aung Ko te chu CDF/CDM te suma an tanpui loh bakah CDF Matupi nena inzawmna an neih loh thu CDF-Matupi hruaitu pakhat chuan heti hian a sawi.
“Anni pahnih chu military council puhna CDF te tanpui tih a ni a, CDF/CDM te tanpuia puhna chu a nihna takah chuan engmah inkaihnawihna an nei lo, chung pawlah pawh an inhmang lo, anmahnia awm mai mai an ni,” tiin a sawi.
Matupi khuaah CDF pawl nena inkungkaihna neia puh man tawk thalai 7 pawh May ni 31-ah military council-in a tantir vek tawh thu hriat a ni a.
Kum 2021 August ni 20-a man tawk Matupi township, Champian khua leh Karl khuaa thalai 6 zinga 4 te chu May ni 31-ah hna rim thawh leh kum 2 chhung lung in tang tura tih an ni.
Chutiang bawkin kum 2021 August ni 14-a man tawk Matupi khua Lawngvan venga Pa Thung pawh May ni 31-ah hna rim thawka kumg 5 chhung tan tura tih a ni bawk a.
Anni ho chu Matupi khua polic station-ah la hren reng niin, khaw pui lama thawn thuai an nih theih thu hriat a ni.
