Chin State, Matupi khawpuia, Military Council sipaite Camp chu September 19, zan khan CDF=Matupi Battalion ten an kahnaah Military Council sipaite 6 an thih thu hriat a ni.
Matupi khawpui atanga mel 2 vel hla, Matupi khaw luh dawn hnaiha, Military Council sipaite Camp chu September 19, tlai dar 5:00 vel khan CDF-Matupi Battalion ten an luh chilh a, Military Council sipai 6 an thi a, mi 8 an hliam thu CDF-Matupi ten nimin khan an thuchhuahah an tarlang.
“ Mindat khawpui leh Matupi khawpui, luh dawna Gate-ah lirthei kal reng reng an dang vek thin a. Ambulance leh Ration phur pawh ni se, an duh duha an dan chah thin avangin CDF-Matupi ten kan kap a ni” tiin CDF-Matupi, information-a thuneitu pakhat chuan a sawi.
He inkahna hi Matupi khawpuia veivahnaa an hman lun ber, Mindat khawpui leh Matupi khawpui, inkar kawngpui, Welcome tih Signboard an tarna kianga Military Council sipaite Camp siamna hmun a ni a. Mipui kal reng reng an dan chah vek thin avangin Military Council sipaite chhan letna a ni tiin CDF-Matupi ten an thuchhuahah an tarlang.
He inkahnaah hian CDF-Matupi lamah thi leh hliam an awm loh thu hriat a ni.
Matupi township-ah hian PDF-te leh Military Council sipaite inkah a awm tawh loh hnu, thla 2 dawn vel a nih hnuah September 19, tlai lam khan inkahna a chhuah leh avangin Military Council sipai ten ralthuam lian leh te an chelek nasa hle tih thu hriat a ni.
