Chin State chhim lam Matupi township-ah MPT phone Miliatry council-ten an hawn leh tawh thu hriat a ni a.
Military council-ten Martial law an puanna Matupi township-ah kum 2023 January thla tir atang khan phone an khar a, thla 4 hnu May 20 atangin MPT phone an hawn leh thu hriat a ni a.
“MPT a hman theihna ni 3 chauh a la ni a, tun hma kha chuan MEC leh MPT hman theih a ni a, May 23 atang khan MEC an khar leh” tiin Matupi tualchhunga mi pakhat chuan a sawi a.
Matupi township-ah hian tun hmain MPT leh Telenor (Atom) phone hman thin a ni a, CDF pawlte leh Military council sipaite an inbeih hnu atang khan Military council sipaiten phone hman theihna zawng zawng an khar vek a.
Smart phone an off tawh hnuah tualchhung mipuiten Land-line phone an hmang nasa hle a, chu pawh chu Military council sipaiten an kharsak leh avangin tualchhung mipuiten harsatna an tawh thu hriat a ni bawk.
Tun dinhmunah hian Chin State-ah MOCHA thlipui tleh avangin Matupi township hi chhiat tawh nasat ber hmun a ni a, Military council-te pawhin chhiatna hmunpui berah an ngai a. Military council sipaiten Matupi khuaa thlipui tuarte tan tanpuina an pek bakah MPT phone hman theihna an hawnsak bawk a ni.
