Chin State, Matupi khuaah Military council kut hnuaia pawl 10 Exam chhang mi 141 chauh an awm thu hriat a ni.
Tum dangah chuan Matupi khuaah pawl 10 Exam chhang mi 3000 chuang an awm laiin Military council ten thuneihna an lak hnu hian exam chhang an awm mumal tawh lo a ni.
March 8 khan exam chhang tur hming inpe mi 180 an awm laiin mi 140 vel chauhin an chhan thu hriat a ni a, exam chhang lo mi 40 vel an awm thu an sawi a ni.
Matupi khuaah hian High school 2 a awm a, pawl 10 zirlai an tlem avangin High school No.2-ah chauh exam an chhan thu hriat a ni.
Paletwa khuaah pawh tum dang angin High school zirlai an tlem hle a, High school 2-ah chauh exam an chhan thu hriat a ni a. exam chhang lo an tam hle thu hriat a ni bawk.
Chin State pumah kum 2022 zir kumah khan pawl 10 exam chhang mi 2259 an awm a, mi 605 an pass a. kuminah erawh chuan mi 3000 chuangin an chhan thu hruat a ni.
Myanmar rampumah Military council kut hnuaia nikum 2022 University Entrance, pawl 10 exam chhang zawng zawng mi 280000 an awm a, mi 130000 chuang an pass a, rampum huapa pass zat Zaa 46.88 an nih thu Military council hnuaia Education minister ten an thuchhuahah an tarlan thu hriat a ni.
