Military council sipaite leh Chin mipui venghimtu pawlte inkarah inkahna nasa tak thlenna Chin state chhim lam Matupi twonship-ah January thla atangin bungraw phur truck lut a awm tawh lova, buhfai, tuialhthei tlachhamin, harsatna an tawh thu Matupi tualchhung mi pakhat chuan heti hian a sawi.
“Tunah chuan buhfai lei tur a awm tawh lo. A zuar pawh an awm lo. A chhan chu motor a rawn lut thei lo a. Buhfai chu Pakhauhgu lam atanga rawn lut a ni a, motor service a theih loh a, truck pawh a rawn thleng thei tawh lo. A hmaa khawlkhawmsa kan la ei mek a ni.”
January thla hmasa atangin Matupi-Mindat kawng leh Matupi-Hakha kawngah military council sipaite leh Chin mipui venghimtu pawlte an inkap nasa hla a, driver-ten an motor an khalh chhuak ngam lova, Matupi khaw chhungah bungraw lut leh chhuak engmah a awm zui ta lo bawk a ni.
Tualchhung mi tam zawkten buhfai ei tur an nei tawh lova, mi dang lo chheckkhawlsate hnen atanga puk chhawngin an ei tawk tawk a, chutih rualin thing tlang lama buh tharte buh her chhuah an lei chhawng ve leh bawk tih hriat a ni a.
Chutianga hun rei tak bungraw lut a awm loh avangin, mipui lam chuan tun hmaa bal leh vaimim ringawt ringa an lo awm tawh ang dinhmun an thlen leh mai theih thu Matupi tualchhung mi pakhat chuan heti hian a sawi.
“Tunah chuan a khaw pumin buhfai kan thlachham tawh a. Tun thla chu kan la phang lutuk lo a, a hmaa bag li nga vel lo dah that kan nei a, a nei ve lote chu an harsa hle dawn a, tun atanga thla hnih thumah chuan a harsa lehzual ang a, bal leh vaimim vel ringin kan awm leh hmel a ni.”
Chu mi chungchag chu Matupi town, District General Administrator hnenah thlen tawh mah se, eng chhanna mah hmuh a nih loh thu Matupi khaw chhunga upa pakhat chuan heti hian a sawi.
“Administrator hova meeting kan neihin kan thlen a. Petrol leh Diesel te a awm loh avangin, buh deng khawl neitute May-June thla chho thlenga hna an thawh theih loh chuan lo neitute pawhin harsatna an tawk dawn a, leilet khawl pawh a hman theih loh ang. A theih chuan township danga miten lei kan leh theih nan leh buhfai kan lak luh theih nan, buhfai phur motor-te engtia ruahman chi nge ni ang tiin kan thleng a, chawlhkar khat a ni tawh a, chhanna engmah kan la dawng lo. Danglamna a awm lo ni.”
Tun dinhmunah buhfai bakah tuialhthei pawh a awm tawh lova, tun hmaa cheng sang khata lei theih petrol bur khat chu cheng 5000 thlengin a kai chho a, pawn chhuah pawh a harsat phah thu hriat a ni a.
Matupi township-ah January thla thar atangin military council sipaite leh Chin mipui venghimtu pawlte inkara inkahna a nasa chho zel a, tunah pawh Hakha-Mindat-Paletwa lam atanga Matupi khaw luhna kawng chu khaw pawnah sipai check gate siamin security a khuah hle tih hriat a ni.
