Myamar rama thuneihna latu military council tana US dollar maktaduai tel man ralthuam leh sipai lam thil supplytu Myanmar leh Singapore company 116 lai a awm thu Myanmar sipaite human rights dan bawhchhiatna enthlatu pawl Justice for Myanmar chuan thuchhuah a siam a ni.
Chung company-te chu kum 2021, February thlaa sipaiin thuneihna a lak hnu atangin, director 262 leh share-holder-ten an enkawl a. Company 31 telin mite hriat lar tak director 77 leh share-holder-ten sipaite tan ralthuam an supply a.
Chu bakah, company 27 leh director 51 telin, share-holder-ten kum 2017 atangin sipaite chu ralthuam leh sipai lam hmanruate an lo supply tawh a. Chu mi kum chu Rohingya an suat kum a nih chu Justice for Myanmar chuan a tarlang a. Chutiang bawkin, Myanmar rama awm company 78 zinga 38 chu Singapore company nen an inthlunzawm a. Singapore chuan Myanmar military council tan hun rei tak thlenga hman tur chi ralthuam telin, sum leh insumdawn tawnna hmangin a tanpui a ni.
Chuvangin, Justice for Myanmar chuan chutianga ralthuam supply-na tel director ho, share-holder ho chu international level-a hrek tur leh military council ralthuam laknate chhu chat vek turin khawvel a ngen a.
Myanmar military council hian kum 2021, Febraury ni 1-a ram chhung thuneihna a lak atangin, pawisawi lo civil mi 2158 a tihlum tawh a, sing khat chuang lung inah a khung a. Jet fighter hmangin civil mite awmna hmun a kapin bomb a thlak a, khaw hrang hranga mipuite thatin, pawngsual leh an thil neihte chhuhsakin a suam a, mipui nuai 7 vel chu raltlantirin pawi nasak tak a khawih bawk a ni.
Ram hrang hrang 111 telna ralthuam supply chungchanga inremsiamnaah mihring suat, war crime leh mihring chunga hleihlenna thlen tur ang chi chu khap tlat a ni a. Mahse, chu inremna thuthlungah chuan Singapore ram chu a tel ve lo.
Chu mi chungchangah, Justice For Myanmar thupuangtu Ma Yatana Maung chuan, ‘Tun thlengin Myanmar military council te ralthuam lama supply vanga hrem tawk mek chu a la thlem tham hel a, company tam zawkin zalen takin an la supply reng hi pawm harsa tak a ni. Military council chu ram tlemte chauhin an hrek bet a, kawng leh lamah zalen takin ralthuam an la chaw lut reng a, chu mi hmangin mipui an rikrap reng avangin, hremna chu khawvel ram zawng zawng tangruala an kalpui chauhin a thlawhtling thei dawn a ni,’ tiin a sawi.
