Chin state chhim lam Matupi khaw luhna leh chhuahna zawng zawng military council-in a khar vek a, tualchhung mite chu zin chhuah leh bungraw phurh luh khap an nih thu hriat a ni.
Matupi khuaah tun hma chuan tualchhung mite an zin chhuah dawnin General administrator hriatpuina lehkha hmangin a zin chhuah theih a, mahse tun hnai atangin hriatpuina lehkha pek chhuah a ni tawh lova, zin chhuah pawh khap a ni, tiin Matupi tualchhung mi pakhat chuan …
“Luh chhuah a theih tawh loh. Thla hnih chhung khar a nih tur thu kan hria. Mindat kawng lamah phei chuan ram hnuaiah flag sen an phun a, tun hmain a awm ngai lo. Chung flag te pela kal chu firing order pek niin kan hria. Tunah chuan tumah khaw pawnah an chhuak lo a, chhuak duhte pawh hriatpuina lehkha an pe miah lo bawk a ni,” tiin a sawi.
Military council sipai pawl chuan Matupi khaw luh chhuahna kawngpui 3, Matupi-Mindat, Matupi-Hakha leh Matupi-Paletwa khuate inkalpawhna kawngpui, khaw luhnaah sipai check gate an dah vek a, tumah kaltlang an phal lo a.
Matupi khua hi Chin state chhim lama ral relna hmun khan tha tak khua niin, military council sipaiho inkulhna hmun ber pakhat a ni a, sipai battalion 2 lai awmna khua a ni. Thla hnih chhung inkahna chhuak lovin, reh deuh mah se, September thla lai hawl atangin CDF-Matupi pawlin an thar thawh leh tan a.
Militayr council lamin chutianga thil a tih chhan chu hriat chian ni lo mah se, September ni 19 atanga CDF-Matupi pawlin inkah an rawn thar thawh leh avangin inkahna boruak tang chho zel vang niin Matupi khaw mite chuan an sawi a.
Matupi khaw luh chhuahna zawng zawng khar a, zin chhuah khap a, a thla tel khar a nih dawn chuan tualchhung mipuite tan ei leh bar kawngah harsatna a thlen theih thu Matupi tualchhung mi pakhat chuan ….
“Mipuite tan tun dinhmunah kawng khar a ni a, bungrua thiar luh theih a ni lo, thla hmasa lo lutte kan lei a. Sumdawng thenkhat dah khawl tel, buhfaite chu a la awm a. Khaw chhunga la awm bungruate chu a man a kai sang zel dawn a ni mai. Hetianga khar a nih reng chuan ei leh barah harsatna kan tawk thei a ni,” tiin a sawi.
Military council sipaite leh CDF-Matupi pawlte chu September ni 19 atangin, ni 24, ni 25 leh ni 27 thleng an inkap tawn deuh reng a. Chung inkahnaah military council sipai 17 thiin, CDF-Matupi lamah 1 a thih thu CDF-Matupi pawlin thuchuah an siam a ni.
