Sagaing region, Khin U township tlak lam khaw 10 chuangah Military council sipai ten khawchhung an luhchilh leh avangin tualchhung mi sing (10000) chuang an tlanchhiat thu tualchhung mi ten an sawi.
March 1, khan Ya Taw khua an hal a, March 2,3-ah Kyuntawgyi (Chun Taw Chi) khuaah lut lehin chenna in an hal nasa hle a, tualchhung mi te an tlanchhiat nual thu an sawi bawk a ni.
“Ya Taw khua leh Kyuntawgyi khua bakah a khaw chhehvel khaw 8-a tualchhung mipui te an tlanchhiat nual thu tualchhung mi pakhat chuan heti hian a sawi.
“Kan tlanchhiatna hi zan 3, ni 4 a ni tawh a, khaw hrang hrang, hmun hrang hrangah kan insawn kual tam hle a. Chaw fun an sem chuan kan ei a, chawnghei chan pawh a awm thin. Zanah inthuam lumna eng mah kan keng lova, ramhnuaiah puanfen sinin kan riak ringawt thin. Tun chawlhkar chhunga kan tlanchhiatna lamah ke a rawl vek a, kan chau a, kan che peih lo” tiin a sawi a ni.
Sagaing region, Khin U township hi Military council ten thuneihna an lak hnuah Martial Law an puanna khua a ni a. Military council sipai ten February 9 atanga March 3 thleng khan khaw 7-ah chenna in 600 chuang an hal chhiat tawh thu tualchhung mi ten an sawi a ni.
Military council sipai ten khawchhung In an hal chhiat hi, Military council sipai te hal a nih loh thu an sawi ve thung a ni.
